Тэнцүү шахуу төлөөлөлтэй болсон Орхон аймаг дахь улс төрийн хоёр нам ганцхан төлөөлөгчийн саналын үнэ цэнийг 2024.10.21-22-ны хооронд өдөр шөнө дамнан хуралдсан ИТХ-ын анхдугаар хуралдаанаараа мэдэрч, мэдрүүллээ. Өглөөхөн хүндэтгэх шалтгааны улмаас нэг төлөөлөгчийн саналаар дутан хайнцаж, илүүрхэх боломжгүй болоод байсан МАН-ыханд аз нь таарав уу, МАН-ын хороон дарга Д.Батлутын улс төрийн нөхцөл байдалдаа сочсон, нууц хөзөр дэлгэгдэв үү? Ямартай ч хүндхэн нөхцөл байдлыг ашигтайгаар эргүүлж чаджээ.

АН-ынхан ч бүлэг дотроо ярьснаасаа эргэж буцаж, талцаж муудалцаад, ахмад настай, амандаа сахалтай Б.Мягмарсүрэнгээ гомдоосноор нутгийн удирдах албанд суух боломжгүй болов бололтой.

   Аль нь байхаас үл хамаарч, НЭГИЙН ХҮЧ-ээр Орхон аймгийн ИТХ-ын даргад Д.Мөнхбат сонгогдсон. Хуралдааны санал хураалтаар мөн л Орхон аймгийн Засаг даргад Б.Зоригтбаяр хоёр хүний саналаар илүүрхэж, дэмжигдлээ. Түүний нэрийг МАН-ын хорооноос Монгол Улсын Ерөнхий сайдад уламжилж, дэмжигдсэн тохиолдолд батламжилна. Нэгэнт гомдсон төлөөлөгчөө танхимаас АН алдаж, өнөөдрийн улс төрийн өрөг МАН-ынх боллоо. Иймд Б.Зоригтбаярын нийтэд ил байгаа 2023 оны ХОМ-ыг танилцуулж байна.

                        Б.ЗОРИГТБАЯРЫН ГЭР БҮЛИЙН ОРЛОГО ДӨРВӨН ЖИЛИЙН ХУГАЦААНД ГУРАВ ДАХИН ӨССӨН
    Бямбадаш Зоригтбаяр нь 2019 оны тайланд нийт орлого нь 11сая 615000 байсан бол, 2023 онд 26сая 692000 болж өсжээ. Харин гэр бүлийн орлого 2019 онд 9 сая 855000 байснаас, 2023 онд 33 сая 300000 болж гурав дахин өссөн. Тэрээр 334 сая төгрөгийн орон сууцтай. 280м2 өмчлөх газар, 15 сая төгрөгийн үнэт эдлэл, дотоодын хадгаламжид 87 сая төгрөгтэй. Бусдаас 150 сая төгрөгийн авлагатай, 211 сая төгрөгийн зээлтэй юм байна.

   Тэрээр Завхан аймгийн Тосонцэнгэл суманд 1983 онд төрсөн. Эхнэр, 4-н хүүхдийн хамт амьдардаг. Эдийн засагч, хүн амзүйч. Орхон аймгийн Жаргалант сумын ХААН банкны эдийн засагч, Орхон аймгийн Төрийн банкны тооцооны төвийн захирал зэрэг албыг хашсаны эцэст 2016 оноос Орхон аймгийн Жаргалант сумын Засаг даргаар ажилласан.