Орхон аймгийн ИТХ-ын ес дэх удаагийн бүрэн эрхийн анхдугаар хуралдаан өнгөрсөн долоо хоногт хуралдаж чадаагүй ч, өнөөдөр бүрэн эрхээ баталгаажуулж хуралдаж байна. Хурлаар МАН-ын бүлгээс Б.Мөнхболд  хүндэтгэх шалтгааны улмаас хуралдаан оролцож чадаагүй. Иймээс МАН, АН-ын бүлэгтэй санал хураахад 20:20 болж тэнцэж, цаашид ИТХ-ын хурлын дарга сонгох боломжгүй болсон. Иймээс уралдааныг маргааш ажлын цагаар үргэлжлүүлэхийг  МАН-ын бүлгээс санал болгосон.

    Гэвч АН-ын бүлгийн дарга Г.Алтангэрэл “Сонгогчид хоёр намд ижил тэнцүү шахуу итгэл үзүүлсэн. Иймд зөвшилцөлд хүрч байж, орон нутгийн цаашдын хөгжил чөдөр тушаагүй урагшилна” гэсэн байр суурийг илэрхийлсэн. Ийнхүү МАН, АН-ын тус бүр цагийн завсарлага авсны дараа хуралдаан үргэлжилсэн.

   Хуралдааны хэлэлцэх асуудлын дарааллын  дагуу ИТХ-ын Хурлын даргад  МАН-ын бүлгээс Д.Мөнхбатыг,  АН-ын бүлгээс Г.Алтангэрэлийг нэр дэвшүүлсэн. Энэ үеэр АН-ын бүлгийн лидерүүдийн нэг  Б.Мягмарсүрэн бүлгийн нөхөдтэйгөө хэлэлцэх асуудлаар зөрчилдсөн тул танхимыг орхин гарав. Ингэснээр маргааш пахин үргэлжлэх үү, удтал хайнцах уу гэдэг нь нэг талдаа гарч,  МАН-ын бүлгээс дэвшүүлсэн Д.Мөнхбат ИТХ-ын даргад ялалт байгуулах нь тодорхой болсон. Б.Мягмарсүрэн, Д.Мөнхбат нар ойр нөхөрлөдөг гэдгийг Эрдэнэтийн улс төрийнхөн андахгүй. Улмаар ИТХ-ын даргад Д.Мөнхбат 51.3%-иар буюу 20 хүнээр дэмжигдэн сонгогдож, бусад төлөөлөгчдөд батламж, энгэрийн тэмдгийг гардууллаа.

ИТХ-ын даргад нэр дэвшүүлэх үеэр санал хураалтад оролцохгүйгээ илэрхийлж, хурлын танхимыг орхисон ИТХ-ын төлөөлөгч Б.Мягмарсүрэнгээс тодрууллаа.

Асуулт: Та өөрөө нэрээ дэвшүүлээд бүлэгтээ дэмжигдсэнгүй юу, эсвэл Д.Мөнхбат найзыгаа дэмжихийн тулд танхимыг орхив уу?

Б.Мягмарсүрэн: Орхон аймгийн Ардчилсан намын удирдлагын зүгээс миний нэрийг ИТХ-ын даргад дэвшүүлсэн юм. Түүнийгээ бүлгийн хурал дээр танилцуулж, дотроо санал нэгдэх хэлбэрээр дэвшүүлэлтээ явуулчихъя гэтэл хэсэг төлөөлөгч нар илтэд хуйвалдаж, намайг унагах хор найруулсан. Тодруулбал, АН-ын бүлгээс ИТХ-ын даргад Н.Баяртогтох, Д.Гантөмөр, Д.Ганболд, Б.Оргилболд, С.Юмэнхүү гэсэн таван хүн нэр дэвшсэн. Б.Оргилболд, Баяртогтох нар маш зөв үндэслэлээр нэрээ татсан.

Харин С.Юмэнхүү, Д.Ганболд, Д.Гантөмөр нар үгсэн хуйвалдаж, өөрсдөө нэрээ татсан нэрийн дор Г.Алтангэрэлийг надтай сөргөлдүүлэн гаргаж ирсэн. Учир нь бүлгийн даргад миний бие Г.Алтангэрэлийг нэр дэвшүүлж, Д.Ганболдтой өрсөлдүүлсэн. Г.Алтангэрэл бүлгийн дарга болсонд хорссон илэрхийлэл юм уу даа.  

Нөгөө талаараа намынхаа ах нарыг ЖИЙХ ажлыг С.Юмэнхүү, Д.Ганболд нар  хошуучлан, бусдыгаа хорт үйлдэлдээ татан оролцуулж байгаа хэлбэр юм.

Би энэ хуйвалдааныг мэдэж байсан учраас бүлэг доторх санал хураалтанд орохгүй гэдгээ ИТХ-ын хурлын дэгийн дагуу илэрхийлээд гарсан.