Ардчилсан намын зөвлөлөөс цаг үеийн асуудлаар Төрийн ордонд хэвлэлийн бага хурал хийлээ. Энэ үеэр АН-ын дарга С.Эрдэнэ “Монгол Улсын төрийн эрхийг барих дээд байгууллага УИХ-ын ээлжит найм дахь удаагийн сонгуулийн сурталчилгааны  ажил ид дундаа явж байна. Ардчилсан намын хувьд сонгуулийн үйл ажиллагаагаа  амжилттай зохион байгуулж байгаа. Ардчилсан намаас 21 аймаг, есөн дүүрэгт өрсөлдөж буй нэр дэвшигчдийн хувьд одоогоор ямар нэгэн хууль зөрчсөн үйлдэл гаргаагүй. Бид энэ удаагийн  сонгуульд анхнаасаа амжилттай оролцох зорилго тавьсан. Зорилтоо ч биелүүлнэ. Улс орны нийгэм, эдийн засгийн нөхцөл байдал хүнд байгааг бид мэдэж байгаа. Харамсалтай нь өнөөгийн эрх баригчид сонгуульд бүх хүчээ хаяад нийгэм, эдийн засгийн нөхцөл байдлыг орхигдуулаад байна. Улс оронд ямар ч нөхцөл байдал үүссэн бай Засгийн газар хэвийн үйл ажиллагаагаа явуулж, бүрэн эрхээ хэрэгжүүлэх чиг үүрэгтэй. Хар тамхины асуудлаас болж олон улсын эдийн засгийн хоригт орсон. Монгол Улсын  гадаад нэр хүнд туйлын хүнд байна. Тиймээс улс орны гадаад нэр хүнд таагүй байгаа энэ цаг үед Ардчилсан нам сонгуульд ялалт байгуулвал “Монгол улсын дараагийн Ерөнхий сайдад Р.Амаржаргалыг нэр дэвшүүлэх санал гаргаж дэмжлээ” хэмээн мэдэгдсэн юм. Харин Р.Амаржаргалын хувьд “Би энэ саналыг өглөө л мэдлээ. Миний хувьд нам, засгийн газраас их үүрэг хариуцлага хүлээлгэж буй шийдвэр гэж харж байна. Энэ асуудлаар ойрын хугацаанд дахин мэдээлэл хийх болно” гэж мэдээллээ.