УИХ-ын сонгуулийн 20 дугаар тойрог Орхон аймаг Эрдэнэт хотод Монгол улсын Ерөнхий сайд, Монгол Ардын Намын дарга Ухнаагийн Хүрэлсүх ажиллаж, иргэд сонгогчидтой уулзлаа. Тэрээр өнгөрсөн хугацаанд хийж хэрэгжүүлсэн ажил болон МАН-ын сонгуулийн мөрийн хөтөлбөрөө танилцуулсан юм. Уулзалтын үеэр хэлсэн үгэндээ эрүүл хүнс, эрчим хүч, төмөр зам, дэд бүтэц, харилцаа холбоо мэдээллийн технологи бол Монгол улсын хөгжлийн таван үндэс суурь бөгөөд энэ бүхнийг ирэх дөрвөн жилийн намын мөрийн хөтөлбөртөө гол чиг баримжаа болгосон гэдгээ онцлон тэмдэглэлээ. Монгол улс дэлхийн нефтийн үнийн хөөрөгдөлд автдаггүй, эрчим хүчнээс хараат бус, долларын ханшийг тогтоон барьдаг, экспортлогч орон болох цаг мөдхөн ирнэ гэдэгт итгэлтэй байна хэмээсэн юм. Мөн Монгол улсын нутаг дэвсгэрээр ОХУ, БНХАУ-ыг холбосон хийн хоолой дамжин өнгөрөх бөгөөд газар нутгаараа уг хоолойг дамжуулан өнгөрүүлсний хөлсөнд жилд улсын төсөвт нэг тэрбум ам.доллар орж ирнэ гэдгийг санууллаа. Энэ бүх ажил хөрсөн дээр буусан тул ирэх дөрвөн жилд эхэлсэн ажлаа дуусгах урам хайрлаж, багаар нь дэмжиж, хүчээ нэгтгэхийг уриалж байна. Орхон аймгийн иргэд Ерөнхий сайдыг дэмжиж ирэх жилүүдэд эхэлснээ дуусгаж, Монголын төрд шударга ёсыг бий болгоно гэдэгт итгэлтэй байна. Учир нь иргэдэд ирээдүй хойчдоо “өр биш өв” үлдээдэг Засгийн газар хэрэгтэй. Өнгөрсөн жил уул уурхайгаас олсон орлогоосоо ирээдүйн иргэддээ зориулж 1,2 их наяд төгрөгийн хурамтлал үүсгэжээ. Энэ хуримтлал цаашид улам нэмэгдэх бөгөөд эцэг, эхийн сэтгэлээр ард иргэдээ халамжилж байгаагийн илрэл гэж үзэж байна гэлээ.  Орхон аймгийн Монгол Ардын Намын Сонгуулийн Штаб