УИХ-ын 2020 оны ээлжит сонгуулийн саналын хуудсыг хэвлэх ажил дуусаж, хуульд тавигдсан шаардлагад нийцэж байгаа эсэхийг хянах, шалгах, бэлэн болсон саналын хуудаснуудыг хайрцаглан битүүмжлэх ажил хийгдээд байна. Тиймээс өнөөдөр эхний аймгууд руу түгээх ажил эхэлснийг Сонгуулийн ерөнхий хороо мэдээллээ. Саналын хуудсыг “Монголын үнэт цаас хэвлэл” болон “Таван богд менежмент” компанид хэвлүүлсэн юм. Сонгуульд оролцож буй нам, эвслийн ажиглагчид саналын хуудас хэвлэх, хүлээлгэн өгөх ажлыг ажиглаж, хэвлэх саналын хуудасны эхийг ажиглагчдаар хянуулан гарын үсэг зуруулж баталгаажуулсан байна. Саналын хуудас хэвлэх ажилтай зэрэгцэн санал тоолох төхөөрөмжийг шалган туршиж, баталгаажуулан гэрчилгээжүүлэх ажил хийгдэж байгаа юм. Энэ ажлыг Төрийн байгууллагуудын ажилтнуудаас бүрдсэн ажлын хэсэг гүйцэтгэж, сонгуульд оролцож байгаа нам, эвслээс томилогдсон ажиглагчид ажиглахаас гадна “Мидас” Төрийн бус байгууллага хөндлөнгийн хяналт хийж байгаа юм. СЕХ-НЫ ДЭРГЭДЭХ МЭДЭЭЛЭЛ, ТЕХНОЛОГИЙН ТӨВИЙН ЗАХИРАЛ Ж.ЭРДЭНЭБАТ “Улсын хэмжээнд нийтдээ 400 гаруй хэсэг дүн дамжуулах сүлжээнд холбогдоогүй байгаа. Дүн дамжуулах сүлжээ маань дата, өгөгдөл шиддэг учраас заавал дата сүлжээтэй байх ёстой. Эдгээр 400 гаруй хэсгийг судалж үзээд хамгийн хол байрлалтай, зам бартаатай газруудад сансрын холбооны төхөөрөмж тавихаар шийдвэрлэсэн. Нийт 82 хэсгээс сансрын холбооны төхөөрөмжөөр дүнгээ авахаар байна. Бусад үлдсэн хэсэг нь харьцангуй сүлжээтэй газар руу яваад дамжуулахад ойрхон. Бидний одоогийн тооцоолж байгаагаар 3-4 цагийн дотор санал хураалтын дүн бүрэн ирнэ гэсэн тооцоотой байна”