Н.Номтойбаяр шүүхийн үндэслэлгүй шийдвэрээр цагдан хоригдож байгаа ч Хан-Уул дүүрэгт УИХ-ын сонгуульд албан ёсоор нэр дэвшиж буй хэвээр шүү гэдгийг сонгогчдод дамжуулж өгөөрэй гэснийг түүний өмгөөлөгч хэллээ. Мөн тэрээр "Иргэд хүчтэй" гэж хэлсэн гэдгийг онцоллоо. Түүний өмгөөлөгч "Тэрээр тавдугаар сарын 28-наас хойш хоригдож байна. Түүнийг цагдан хорих шийдвэрийг хэвээр үлдээлээ. Энэ шийдвэрт үнэхээр харамсаж байна. УИХ-ын сонгуулийн тухай хуулийн  35.2.1 дэх заасан үндэслэлийг тайлбарлаж өгөөч гэж хүсэхэд чадаагүй. Өөрөөр хэлбэл тайлбарлахдаа шүүхэд тэр зохицуулалт хамаагүй гэлээ. Шүүгч өөрөө Улсын дээд шүүх хуульд тайлбар хийдэг бүрэн эрхийг хэрэглэсэн. Шүүгч хуралдааныг энэ сарын 17-ны өдөр гэж зарласан ч цагаа хэлсэнгүй. Сонгууль дуустал буюу энэ сарын 24-нийг хүртэл Н.Номтойбаярыг цагдан хорих юм байна гэж ойлголоо. Сонгуулийн үйл ажиллагаанд биечлэн оролцох ямар ч боломжгүй боллоо. Ямар шалтгаанаар гаргахгүй гэж байгаа нь ойлгомжгүй. Шүүх шийдвэрийнхээ үндэслэлийг тайлбарлахгүйгээр таслан сэргийлэх ажиллагааг хэвээр л үлдээчихлээ. Хэргийн оролцогчоос асуухаар тодорхой үндэслэл хэлж өгдөггүй. Хуульд үндэслэл бүхий байж шүүхийн шийдвэр гарах ёстой гэж бий. Тодорхой үндэслэлээр энэ хүнийг гаргах боломжгүй гэдгээ л хэлэх ёстой. Тиймээс хэргийн оролцогчийн хувьд таамаглал төдий л болчхоод байна. Ийм байж болохгүй. Шүүх хуралдаан зургаадугаар сарын 26-ны өдөр товлогдсон байсан. Гэтэл үүнийг яагаад өөрчлөв. Энэ шийдвэр шүүх сонгуулийн ерөнхий хорооноос зөвшөөрөлгүйгээр хэнийг ч баривчилж болох юм байна гэсэн жишиг тогтоолоо. Бусад хуулийг хэрэглэх эсэх нь шүүгчийн өөрийн мэдэх асуудал болчихсон юм байна. Түүний бүрэн эрхийг түдгэлзүүлсэн боловч УИХ-ын гишүүн хэвээр юм. Энд гишүүний давуу эрх гэж ярих гээгүй юм шүү" гэлээ.