Улс төрийн сонгуулийн сурталчилгаа ид дундаа явж буй энэ өдрүүдэд олон нийтийн санаа бодлыг төөрөгдүүлэх оролдлого газар авч байна. Тухайлбал, Зэсийн катодын үйлдвэр барих ажлаа эхлүүлээд буй "Зэс Эрдэнийн хувь" компанийн хувьцаа эзэмшигчдийг үзэл бодлоор нь барьцаалан, намаасаа гарахыг шаардаж, улс төрийн өнцгөөр ажлыг нь зогсоон дарамталж байгааг тус компанийн удирдлагуудын төлөөлөл Ардчилсан намын байранд ирж мэдэгджээ. Энэхүү байдлаас үүдэн Ардчилсан намд гишүүнчлэлтэй тус компанийн хувьцаа эзэмшигчид учир явдлаа тайлбарлан, аргагүй байдалд орсноо хэлж намаас гарах өргөдлөө өнөөдөр Ардчилсан намын удирдлагуудад өгсөн байна.  Тус намын удирдлагуудын зүгээс “Зэс Эрдэнийн хувь компанийн үйл ажиллагааг Ардчилсан нам үргэлж дэмжсээр ирсэн, цаашид ч дэмжих болно. Ардчилсан намын хувьд Иргэдийн эрх ашиг үргэлж нэгдүгээрт байж, дотоод ардчиллыг эрхэмлэдэг тул гишүүд  орж гарах нь нээлттэй” гэдгийг онцолсон юм. Түүнчлэн Зэс Эрдэнийн хувь компанийн хувьцаа эзэмшигчдийг үйлдвэрээ амжилттай барьж байгуулан, олон арван ажлын байр нэмэгдүүлэхийг хүсэж, цаашдийн зам мөр нь дардан байхыг ерөөв. Энэ үеэр Зэс Эрдэнийн хувь компанийн хувьцаа эзэмшигчид ямар нэг үзэл бодлын зөрүүтэй байдал, өөрсдийн хүсэлтээр бус улс төрийн нөхцөл байдлаас шалтгаалан намаасаа татгалзах болсондоо харамсаж буйгаа илэрхийлээд, ирэх УИХ-ын сонгуульд амжилттай оролцохыг Ардчилсан намынханд хүслээ.