УИХ-ын сонгуулийн 20 дугаар тойрог, Орхон аймагт МАН-аас нэр дэвшигч Дамбын Батлут, Батнасангийн Оюунгэрэл, Цэндийн Нямдорж нарын иргэд сонгогчидтой хийх уулзалт Эрдэнэ, Согоот, Уурхайчин багуудад үргэлжиллээ.             Нэр дэвшигчид намаас дэвшүүлж буй мөрийн хөтөлбөрөө танилцуулж, иргэдийн санал сэтгэгдэлийг сонссон юм. Иргэдийн зүгээс Эрдэнэт хотын иргэдэд сэтгэл санааны болон хөрөнгө санхүүгийн асуудал үүсгэсэн “Зэс Эрдэнийн хувь” хэмээх тодорхойгүй асуудалд шийдэл олж, гарц хайж, эцэслэн шийдэж өгөхийг хүсч байлаа. Түүнчлэн ахмад үеийнхэн цогцлоон бүтээж, залуу үеийнхэн түүчээлэн хөгжүүлж байгаа Монголын амин сүнс болсон Эрдэнэт үйлдвэрийг 100 хувь төрд хөдлөшгүйгээр байлгаж, амар амгалан ажиллаж, амьдруулахыг ч Эрдэнэтчүүд сануулж байна.             Ирэх он жилүүд Монголчуудын хувьд сайн сайхныг авчирсан, дэвшил бүхэн цогцолж, бүтээл ундарсан жил байх болно. Ийм сайхан цагийг бүтээхийн тулд бид хариуцлагатай сонголт хийж, хүн бүрийн хүндлэл хүлээсэн шударга Ерөнхий сайд У.Хүрэлсүх, түүний багийг бүтнээр нь дэмжих нь чухал гэдгийг сонгогчид хэдийн ойлгожээ. Хэн нэгний сайхан ярианд итгэхгүй, хэдэн төгрөгөнд хууртахгүй, мэргэн сонголт хийхээ ч сонгогчдын үе үеийн төлөөллүүд хэлж байна.             Эрдэнэт үйлдвэрээс 7 Хөдөлмөрийн баатар төрсөн байдаг. Хөдөлмөрийн баатрууд МАН-аас нэр дэвшигч Дамбын Батлут, Цэндийн Нямдорж, Батнасангийн Оюунгэрэл нарыг дэмжиж, уулзалтанд оролцож, үйлдвэрийнхээ цаашдын хувь заяаны төлөө дуу хоолойгоо нэмэрлэхээ ч нуугаагүй. Түүнчлэн Эрдэнэт үйлдвэрт ажиллаж, залуу халуун насаа өнгөрүүлсэн ахмадууд МАН-ын дарга, улсын Ерөнхий сайд У.Хүрэлсүхэд талархалаа дамжуулж, чадварлаг, хүчтэй багийг Орхон аймагт илгээсэнд баяртай байгаагаа уламжилсан юм. Ийнхүү уулзалт бүхэнд иргэд сонгогчид уухайлан дэмжиж, санал бодлоо хэлсээр байна.