УИХ-ын Сонгуулийн 20 дугаар тойрог, Орхон аймагт МАН-аас нэр дэвшигч Цэндийн Нямдорж, Дамбын Батлут, Батнасангийн Оюунгэрэл нарын иргэдтэй хийх уулзалт өнөөдөр Бүрэнбүст, Уртбулаг багт үргэлжиллээ. Монгол улсын Үндсэн хуулийн шинэчлэлээр олонх болсон намын дарга Ерөнхий сайд болж, салбар яамдынхаа сайд нарыг өөрөө томилох заалт хэрэгжиж эхэлсэн. Өөрөөр хэлбэл Засгийн газар тогтворжих үндэс тавигдсан. Тиймээс иргэдийн хувьд чухал сонголт хийх цаг үетэй тулгараад байгаа билээ. МАН-ын дарга У.Хүрэлсүхийг ирэх дөрвөн жилд дахин Ерөнхий сайдаар ажиллуулж, шударга ёсны төлөөх тэмцлийг нь үргэлжлүүлэх, Монгол төрийн төлөө зүтгүүлэхэд та бидний сонголт чухал үүрэг гүйцэтгэнэ. Тийм ч учраас У.Хүрэлсүхийн багаас Орхон аймагт илгээсэн гурван нэр дэвшигчийг багаар нь дэмжиж, итгэл үзүүлэх нь чухал гэдгийг иргэд нэгэнтээ ойлгож, дэмжихээ илэрхийлсээр байна. Монгол төрийн ноён нуруу болж, залуу үеийнхнийг халамжлан хүмүүжүүлж, шударга үнэний төлөө амь бие, алдар нэрээ үл хайрлан зүтгэсээр ирсэн Цэндийн Нямдорж, Монголын хүн амын 51 хувийг эзэлдэг эмэгтэйчүүдийн эрх ашгийн төлөө тууштай зүтгэх Батнасангийн Оюунгэрэл, Эрдэнэтчүүдийнхээ аж амьдрал, жаргал зовлонг мэдэх Дамбын Батлут нарыг багаар дэмжиж, “ХҮЧЭЭ НЭГТГЭХ”-ээ илэрхийлсэн  иргэдийн сэтгэгдэл ч өндөр байна. Нэр дэвшигчдэд ахмадууд захиас, сургаалиа хэлж, дунд үеийнхэн итгэл хүлээлгэн уухайлж, залуучууд гэрэлт ирээдүйн төлөө саналаа хэлж байлаа. “Алдаа гаргахад минь түшиж, амжилт гаргахад минь уухайлан дэмжиж ирсэн Эрдэнэтчүүддээ баярлалаа” хэмээн нэр дэвшигч Дамбын Батлут талархалаа илэрхийлэв. Харин нэр дэвшигч Батнасангийн Оюунгэрэлийн хувьд “Гэр бүл, эхчүүд, эмэгтэйчүүд, хүүхдийн асуудлыг соргогоор харж, шийдэж ажиллах нүд нь байх болно” гэдгээ ч хэлсэн. Цэндийн Нямдорж нэр дэвшигчийг Эрдэнэтийнхэн төдийгүй Монголчууд андахгүй. Тэрээр “Намайг харлуулдаг цөөн хүн байхад дэмждэг олон мянган Монголчууд бий. Тэдний нэг хэсэг нь Эрдэнэтчүүд та бүхэн шүү” хэмээж байлаа. Ийнхүү нэр дэвшигчид намын мөрийн хөтөлбөрөө танилцуулж, иргэдтэй уулзсаар байгаа бөгөөд Эрдэнэтчүүд “ХҮЧЭЭ НЭГТГЭЖ”, багаар нь дэмжихээ илэрхийлсээр байна.