Орхон аймгийн Ардчилсан нам сонгуулийн сурталчилгаагаа албан ёсоор эхлүүлж, нээлтийн үйл ажиллагаагаа 2020 оны 6 дугаар сарын 4-нд “Амар”-ын талбайд зохион байгууллаа.  УИХ-ын 8 удаагийн сонгуульд Орхон аймаг, 20 дугаар тойрогт Ардчилсан намаас УИХ-ын гишүүн Октябрийн Баасанхүү, Орхон аймгийн Ардчилсан намын дарга Цогтсайханы Батхуяг, УИХ дахь Ардчилсан намын бүлгийн, Хуулийн бодлогын зөвлөх, Ардчилсан намын нарийн бичгийн дарга Дэмбэрэлийн Оросоо нар томилолт өвөртлөн, нэр дэвшиж байгаа юм. Ардчилсан нам 2020 оны УИХ-ын ээлжит сонгуульд “Өсөлтийг өрх бүрд” мөрийн хөтөлбөртэй оролцож байгаа бөгөөд Монгол улсын тусгаар тогтнол, Үндэсний эрх ашиг, үндсэн хуульт Ардчиллаа хамгаалан бэхжүүлж, хувь хүний эрх чөлөө, хуулийн засаглал, чөлөөт зах зээл иргэний  нийгмийн зарчимд суурилсан баруун төвийн намын хувьд өрхийг дэмжсэн өсөлтийн бодлого мөрийн хөтөлбөрөө сонгогчдодоо толилуулж байна. Орхон аймгийн ахмад, эмэгтэйчүүд, залуучуудын төлөөлөл нээлтийн үйл ажиллагаанд оролцож нэр дэвшигчдэд баяр хүргэж, улс төрийн үйл хэрэгт амжилт хүссэн бөгөөд ээжүүд алд цэнхэр хадаг, мөнгөн аягатай сүү барьж, зам мөр нь дардан байхыг ерөөлөө. Мөн нээлтийн үеэр нэр дэвшигчид "Энэ удаагийн сонгуульд хүний эрх, эрх чөлөө, хэвлэл мэдээллийн эрх чөлөөг дээдлэн, улс төрийн намуудтай шударга нээлттэй зарчмаар өрсөлдөх болно" гэдгээ илэрхийлсэн. Хамгийн гол нь "Ард түмний хүсэж байгаа зөв зүйтэй бодлого, хөгжлийн төлөөх сэтгэлээр л сонгуульд оролцож байна" гэсэн юм. Ардчилсан намын аливаа  үйл ажиллагаа ард түмэнд үргэлж нээлттэй байдаг гэдгийг онцлоод, бусад өрсөлдөгчдөдөө амжилт хүсээд, сонгуульдаа хуулийн хүрээнд, шударга ажиллахыг мөн уриалав. 2020 оны УИХ-ын ээлжит сонгуулийн Орхон аймгийн Ардчилсан намын төв штабын Ерөнхий менежерээр Баян-Өндөр сумын Ардчилсан намын дарга Д.Ганболд ажиллаж байгаа юм.