Чингэлтэй дүүргийн Эрүүгийн хэргийн анхан шатны шүүхээс Хан-Уул дүүргийн 29 дүгээр тойрогт бие даан нэрээ дэвшүүлсэн Н.Номтойбаярыг зургаадугаар сарын 26-н хүртэл цагдан хорих шийдвэрийг гаргасан.  Н.Номтойбаяр хорих 461-р ангид саатуулагдаж байгаа юм. Тэрбээр бусад бие даан нэр дэвшигчийн адил өөрийн биеэр СЕХ-ноос очиж, нэр дэвшигчийн үнэмлэхээ гардан авах ёстой. Гэвч түүний итгэмжлэгдсэн төлөөлөгч болох аав Б.Нямтайшир үнэмлэхийг нь авахаар СЕХ-нд очоод байна. Тэрбээр "Миний хүү Номтойбаяр ХУД-ийн 29 дүгээр тойрогт бие даан нэр дэвшсэн. Харамсалтай нь өөрийн биеэр нэр дэвшигчийнхээ үнэмлэхийг гардан авах боломж олдсонгүй. Дөнгөж сая 587 дугаартай сонгогчийн нэр дэвшигчийн үнэмлэхийг нь авлаа. Эцэг хүний хувьд хэлэхэд, Монгол улсад үйлчилж буй хууль тогтоомжийнхоо хүрээнд асуудлыг шийдвэрлэн хуулийн зүйл заалтаа ягштал, тууштай шударга баримталсан Сонгуулийн ерөнхий хорооны дарга гишүүдэд талархлаа илэрхийлье. Нэр дэвшигчийнхээ тогтоолыг гардаж авчихсан байхад нь цагдан хорих шийдвэр гаргалаа. Энэ нь Монгол улсын Сонгуулийн тухай хуулийн 35.2 дох зүйл заалтыг зөрчсөн үйлдэл. Харамсалтай нь ардчилсан нийгэмд анх удаа төрийн эрх барих дээд байгууллагад нэр дэвшигч шоронгоос сонгуульд өрсөлдөхөөр болж байна. Өнгөрсөн зуунд монголын түүхэнд тохиолдсон бүх хэлмэгдүүлэлтэд миний өвөө, аав, би өөрөө өртөж байсан. Хэлмэгдүүлэлт ямар их зовлон авчирдагийг монголын ард түмэн мэднэ. Хэрэв түүнийг улстөрийн зорилгоор суллахгүй бол эцэг хүний хувьд түүний дуу хоолой болж сонгуулийн кампанит ажилд нь идэвхийлэн оролцох болно" гэлээ. эх сурвалж: zuv.mn