Бие даагчийн гарын үсэг цуглуулахад хамгийн их дэмжлэгийг авч чадсан хүчтэй өрсөлдөгчөөр нэрлэгдээд буй Н.Номтойбаярыг шүүхийн урьдчилсан хэлэлцүүлгээр хорьж орхисон. Сонгууль өнгөртөл хорихоор тооцсон нь санаандгүй зүйл яавч биш байв. Ингэхдээ хууль зөрчиж, хүчээр авч явсан нь цаад зорилгыг нь харуулсаар.    Хуулиараа бол нэр дэвшигчээр бүртгэгдсэн хүнийг Сонгуулийн Ерөнхий хорооны зөвшөөрөлгүйгээр цагдан хорихыг хориглодог. Гэтэл шүүх арга буюу дээрээс өгсөн даалгавар буулгасан мэт алхаа цохиж орхисон. Энэ нь түүнийг нам дарах зохион байгуулалттай киноны "хоёрдугаар анги" байв.  Хэдий зохион байгуулалттай ажиллагаа явагдаж буй ч тэр  цагдан  хоригдож байх хугацаандаа нэр дэвших эрх нь нээлттэй. Ард түмэн ч ингэх тусам, хүчээр дарах тусам нь дэмжинэ гэцгээж байв. Түүнийг нэр дэвшихийг дэмжсэн 30 мянган хүн ч өнөөдөр хүлээж буй. Гэтэл бас нэгэн ээлжит бохир тактик хэрэгжүүлэх гэж байна. Тэр нь СЕХ-ноос Н.Номтойбаярыг өнөөдөр заавал өөрийн биеэр ирж сонгуульд оролцох батламжаа ав хэмээсэн бололтой. Цагдан хоригдож байгаа хүн СЕХ-нд очиж бие даан нэр дэвшигчийн батламжаа авч чадахгүй учир "өөрийн биеэр ирээгүй" гэх шалтгаанаар Н.Номтойбаярыг сонгуульд оролцуулахгүй байх тохироо хийв үү?