Өчигдөр АН-ын гишүүн Х.Ганхуяг мэдээлэл хийж Ардчилсан намд 100 саяын дэнчингээ өгч, нэр дэвшихээр тодроод байгаа горилогчдын нэрсийг зарлалаа. Тэрээр 180 хүн 100 саяын дэнчингээ өгсөн. Үүнд Орхон аймгийн ардчилсан намын бэл, бэнчинтэй 6 гишүүн 100 саяыг хотойхгүй өгч, ирэх сонгуульд хүч үзэхээр горилж буйг ч сийрүүлэн багтаажээ.    Тодруулбал тус мэдээлэлд аймгийн ИТХ-ын төлөөлөгч, Хангайн бүс худалдааны төвийн эзэн Ц.Ойдов, МоАХ, Чандмань ХХК-ийн захирал Д.Өсөхбаяр, Зэс эрдэнийн хувь компаниар танигдсан Д.Алтанхуяг, аймгийн АН-ын дарга Эрдэнэт үйлдвэрийн Баяжуулах фабрикийн дарга асан Ц.Батхуяг, Эрдэнэт үйлдвэрийн хангамжийн хэлтсийн менежер Р.Улаанхүү гэх 5 гишүүний нэрс Орхон аймгийн АН-ын “ТОЛГОЙ БАЯЧУУД”-аар тодроод байна. Мөн эдгээр эрхмүүдийн дээр Орхон аймгийн ИТХ-ын дарга асан Б.Мягмарсүрэн ч байх магадлалтайг зарим гишүүд ярьж байна. Харин АН-ын цэнхэр ордны зарим нь 100 саяа намдаа баттай  тушаасан нь Ц.Батхуяг, Ц.Ойдов, Д.Өсөхбаяр гэх юм...       Гэтэл үсгэн дунд тоо гэгчээр МАХН-ын гишүүн О.Баасанхүү эл намаас нэр дэвшихээр өргөл барьцаа өгсөн гээд нэрсийн жагсаалтад багтаж. О.Баасанхүү яаран зарим хэвлэлд “Унтаад сэрэхэд АН-д 100 саяыг шилжүүлсэн байсан” , "Миний саналыг хүлээн авсан аль ч нам, эвсэлд ороход бэлэн", "Намайг гүтгэсэн" гэх зэрэг эсрэг тэсрэг этгээд тайлбарыг хийж, түмний доог, тохуу болсоор байна...      Харин Орхон аймгийн АН-ын гишүүд, дэмжигч, бусад горилогчид О.Баасанхүүг 20 гаруй жил ардчиллын төлөө бие сэтгэлээ зориулж ирсэн гишүүдтэй зэрэгцэн, намаас квот горилж байгаад таатай бус хандаж байгаа юм байх. Арга ч үгүй биз... Сонгуулийн хаяанд намдаа зүтгэсэн, хийсэн ажил, хэлэх үгтэй нэг нь горилж багтаж шингэхээ олж ядаж байгаа цаг дор, О.Баасанхүүгийн хэлсэн үг, хийсэн үйлдлээ санахаа байчихдаг, хаашаа ч хамаагүй савсганасан поп дүр АН-ын нэр хүнд, орон зайд халтай гэж далдуур ярьцгааж байна. Хэрэв зээ О.Баасанхүү АН-аас нэр дэвшигчээр тодорч гэмээн Орхон аймгийн АН 2016 оны сонгуулийн дүр зургийг давтан, хэдэн фракцт хуваагдаж ч болохоор харагдаж байна. Басхүү дээрх 5 горилогчдын зарим нь Эрдэнэт үйлдвэр ТӨҮГ-т тодорхой алба хашиж байгаа нь олон нийтийн дунд Яагаад? Яагаад? гэсэн асуулт дунд мэтгэлцүүлж, бухимдуулж байна. АН хэний хүүд итгэл үзүүлж, хүрд эргүүлэх боломж олгох нь тун удахгүй тодорхой болно.