Коронавируст халдвар дэлхий нийтийг хамарч буй энэ цагт нэгдмэл хүчтэй даван туулахад урлагийн мэргэжлийн сургууль хувьд хувь нэмрээ оруулах болсон талаар Монгол Улсын Консерваторийн удирдлагууд Шадар сайд Ө.Энхтүвшинд танилцууллаа. Тодруулбал авъяаслаг багш, сурагчдынхаа онцгой бүтээлүүдийг цахимаар болон телевизээр өдөр бүр толилуулан соёл урлаг, сонгодог бүтээлүүдээр ард иргэдийн алжаал ядаргааг нь тайлах хүсэлтээ илэрхийлжээ. Мөн коронавируст халдварын эсрэг олон улсын хамтын ажиллагаатай Консерваториудтай хамтран World Music онлайн фестивалийг эхлүүлж байгаа юм. Монгол Улсын Шадар сайд Ө.Энхтүвшин ард иргэдийг соён гэгээрүүлэх санаачилга гаргасанд талархал илэрхийллээ. Тэрээр "Өдөр бүр мэдээллийн хэрэгсэл, нийгмийн сүлжээгээр коронавируст халдварын талаар мэдээлэл цацагдаж байгаа нь нэг талаар ард иргэд "мэдээллийн дарангуйлал"-д өртөхөд хүргэж байна. Үүнээс та бүхний урлагийн бүтээлүүд бага ч болов хөндийрүүлж чадна гэдэгт итгэлтэй байна" хэмээн онцлосон юм. Уулзалтын үеэр Монгол Улсын Консерваторийн нийт багш ажилтан албан хаагчдын зүгээс Улсын Онцгой комисст таван сая төгрөгийн хандив өргөлөө гэж Монгол Улсын Шадар сайдын Ажлын албанаас мэдээллээ.