МАН-ын нарийн бичгийн дарга Ц.Бат-Энх өчигдөр БНСУ-аас Японоор дамжиж Чингис хаан нисэх буудалд газардсан. Шинэ төрлийн коронавирусийн халдвар тархсан бүс нутгаас ирсэн тул албаныхан шинжилгээ авч тусгаарлах гэхэд тэрээр эсэргүүцэл үзүүлсэн тул албадан авч явж Хан-Уул дүүргийн 26 дугаар хорооны нутаг дэвсгэрт орших ОБЕГ-ын харьяа Жаргалант сувилалд хэвтүүлсэн гэж хэвлэлүүд мэдээлсэн. Ерөнхийлөгч Х.Баттулгын айлчлалын баг өчигдөр БНХАУ-аас ирсний дараа Жаргалантад тусгаарласан иргэдийг Цэргийн төв госпиталь руу үүрээр шилжүүлжээ. Харин айлчлалын багийг Жаргалант сувилалд тусгаарласан байна. Засгийн газар, Улсын онцгой комиссоос гаргасан шийдвэрийг эсэргүүцсэн, албан хаагчидтай ёс бус харилцсан гэх шалтгаанаар МАН-ын дарга У.Хүрэлсүх Ц.Бат-Энхийг албан тушаалаас нь чөлөөлөхийг намынхаа Ерөнхий нарийн бичгийн дарга Д.Амарбаясгаланд үүрэг болгов, улмаар чөлөөлөв гэх мэдээллүүд гарлаа. Ийм явдал болсон эсэхийг бид Монгол Ардын намын Хуулийн газрын дарга Р.Саруулаас тодруулснаа хүргэе. -МАН-ын нарийн бичгийн дарга Ц.Бат-Энхийг сонгуульт албан тушаалаас нь чөлөөлсөн гэдэг мэдээлэл хэвлэлээр явж байна. Ийм шийдвэр гарсан юм уу? -Ийм шийдвэр гарах боломжгүй. Учир нь МАН-ын Улсын дээд шүүхээс Монгол Улсын хууль тогтоомжид нийцсэн хэмээн үзэж бүртгэж авсан Дүрмээр Нарийн бичгийн дарга гэдэг бол Намын төлөөллийн төв байгууллага болох Бага хурлаас сонгогддог албан тушаал. Тийм учраас тийнхүү зарчмаараа түүнийг чөлөөлөх, эсэх асуудлыг Бага хурал эцэслэн шийдвэрлэнэ. -Тэгвэл чөлөөлөх шийдвэр гараагүй гэж ойлгох нь зөв үү? -Бага хурал хуралдаж албан ёсны тогтоол шийдвэр гараагүй байхад өөр хэн нэгэн субъект Бага хурлаас сонгогдсон албан тушаалтныг чөлөөлөх үндэслэл байхгүй ээ. -Намын даргын зүгээс нарийн бичгийн даргадаа ёс зүйн хариуцлага тооц гэж Ерөнхий нарийн бичгийн даргадаа хэлсэн гэсэн мэдээлэл гарсан. МАН-ын даргаас өгсөн ийм үүрэг, чиглэл байна уу? -Чухам ийм үүрэг, чиглэл ЕНБД-д өгөгдсөн эсэхийг миний хувьд хүлээсэн чиг үүрэг, хариуцсан ажил албаныхаа хэмжээ хүрээнд мэдэх боломжгүй. Ёс зүйн хариуцлагын тухайд бол хэвлэлээр гараад байгаа мэдээлэлд Нарийн бичгийн даргыг наандаж Зөрчлийн хууль цаашилбал Эрүүгийн хууль зөрчсөн мэтээр шууд буруутгаж бичсэн зүйл анзаарагдсан. Монгол Улсад хүчин төгөлдөр мөрдөгдөж байгаа хууль тогтоомжийн хүрээнд хүн, хуулийн этгээд хууль зөрчсөн эсэхийг эхлээд хуулиар оногдуулсан чиг үүрэг, бүрэн эрх бүхий хууль, шүүхийн байгууллагууд нь шалгаж эцэслэн тогтоодог номтой. Тийм болохоор тийм чиг үүрэг, бүрэн эрх бүхий байгууллагын албан ёсны шийдвэрээс урьдаж буюу хуулиас даваж ямар нэг байдлаар хэн нэгэнд ёс зүйн хариуцлага оногдуулах талаарх асуудал яригдах нь зүй бус. -МАН-ын Бага хурал ойрын хугацаанд товлогдсон зүйл бий юү? -Яг тодорхой тов бол гараагүй ч Улсын Их Хурлын сонгуулийн тухай хуулиар сонгуульд оролцох мөрийн хөтөлбөрөө 2020 оны гуравдугаар сарын 25-ны өдрөөс өмнө Төрийн аудитын байгууллагад хүргүүлэхээр хуульчилсан ба ийнхүү мөрийн хөтөлбөрийн эцсийн хувилбарыг Намын дүрмийн 20.3.2.-т зааснаар Бага хурал хэлэлцэж баталдаг. Тэгэхээр гуравдугаар сарын 25-наас өмнө Бага хурал хуулийн дагуу хуралдаж таарна. Гэхдээ одоогоор яг тодорхой тов гараагүй байна.