УИХ-ын чуулганы нэгдсэн хуралдаанаар 2020 оны төсвийн төслийн анхны хэлэлцүүлгийг хийж, хоёрдугаар хэлэлцүүлэгт шилжүүлэв.  Ирэх жилийн төсвийн төслийг энэ жилийнхтэй харьцуулахад орлого, зарлагыг нэлээд өсгөж, хоёр их наяд төгрөгийн алдагдалтай төсөв өргөн барьсан. Тухайлбал, төсвийн орлогыг энэ оныхоос 3.2 их наяд төгрөгөөр, зардлыг өмнө оноос 2.3 их наяд төгрөгөөр нэмсэн бөгөөд хөрөнгө оруулалтын зардлыг нэмж, өмнөх онуудад бүтээн байгуулалт нь эхлээд  дуусаагүй байгаа барилга объектын ажлыг бүрэн дуусгахаар төлөвлөсөн юм. Нэгдүгээр хэлэлцүүлгийн үед хөрөнгө оруулалтын зардлыг өсгөж бүтээн байгуулалтын ажлуудыг дуусгана гэж байгаатай гишүүд санал нийлж байгаа ч аймгуудын бүтээн байгуулалтын төсвийн хуваарилалт “шог” байна гэж Сангийн сайд Ч.Хүрэлбаатарыг  хатуу шүүмжлэв. Тухайлбал, Улаанбаатар хотоос сонгогдсон Д.Тэрбишдагва, Д.Оюунхорол, Д.Ганболд, Х.Нямбаатар нарын гишүүд зарим аймгуудын  хөрөнгө оруулалт нийслэлийнхээс өндөр байна гэж шүүмжлээд нийслэлд хийх бүтээн байгуулалтын зардлыг нэмэх ёстой гэв. Мөн Өмнөговь, Орхон аймгаас улсын төсөвт хамгийн их орлого төвлөрүүлдэг байхад  яагаад Хэнтий, Увсаас бага хөрөнгө оруулалт хуваарилсан байна гэдгийг хэлээд, Сангийн сайдыг асуудалд ингэж хандах нь шударга бус байна гэж УИХ-ын гишүүн О.Содбилэг, Н.Амарзаяа нар шүүмжиллээ. Жишээ нь, Хэнтийн аймгийг онцгойлон харж үзэж, хамгийн их буюу 142 тэрбум төгрөгийн хөрөнгө оруулалт хуваарилж, илт зөрүүтэй хандсанд Сангийн сайд Ч.Хүрэлбаатарыг буруутгаад хоёрдугаар хэлэлцүүлгийн үеэр засч, өөрчлөх ёстойг сануулж байв. Ядаж хүн амын тоо, төсөвт төвлөрүүлдэг орлогын хэмжээгээр нь аймгуудын төсвийн хөрөнгө оруулалтыг хуваарилах ёстой байсан гэсэн санал ч УИХ-ын гишүүдээс гарч байв.  Сангийн сайд Ч.Хүрэлбаатар хэлэхдээ нөөц боломжинд нь тааруулж хөрөнгө оруулалтыг хуваарилсан, оруулсан төсвийг өөрчлөхгүйгээр баталж өгөхийг хүсээд, гишүүд төсөв дээр улс төр хийж, шатаажлах гэдгээ болих хэрэгтэй гэж хэлсэн нь гишүүдийн эгдүүцлийг хүргэсэн юм.