ХХ зууны манлай бүтээн байгуулалт Эрдэнэт хот үүсэн байгуулагдсаны түүхт 50 жилийн ойг тэмдэглэн өнгөрүүлэхэд 24 хоног үлдээд байна. Монгол Улсын Засгийн газрын тогтоолоор Эрдэнэт хотын 50 жилийн ойн баяр наадмыг “Хангайн бүсийн хурд” хурдан морины уралдаантай хамтатган ирэх сарын 23-25-ны өдрүүдэд зохион байгуулахаар товлосон.

 Түүхт ойн босгон дээр Эрдэнэт хотын өнгө төрхийг шинэчлэх, иргэдийн ая тухтай амьдрах орчныг бүрдүүлэх зорилгоор дэд бүтэц, авто зам, гэрэлтүүлэг, ногоон байгууламж, засвар тохижилтын чиглэлээр хэрэгжүүлж буй “50 жил-50 бүтээн байгуулалт” төсөл, арга хэмжээ эрчимтэй үргэлжилж байна.

    Тухайлбал, 40 жилийн хугацаанд их засвар, шинэчлэлт хийгдээгүй байсан А.Амар сайдын нэрэмжит төв талбайг гантиг чулуугаар шинэчилж, өнгө үзэмжийг нь сайжрууллаа. Тус талбай нь 1986 онд “Найрамдал” талбай нэртэйгээр ашиглалтад орж байсан бөгөөд 2014 онд Иргэдийн Төлөөлөгчдийн Хурлын тогтоолоор Монгол Улсын төрийн нэрт зүтгэлтэн А.Амарын нэрэмжит болсон юм.

 Мөн ойн хүрээнд хотын төвийн 11 байршлын авто замыг асфальт бетоноор шинэчилж, 13 байршилд 400 гаруй гэрэлтүүлэг шинээр суурилуулах, инженерийн шугам сүлжээний шинэчлэл зэрэг бүтээн байгуулалтын ажлууд хийгдэж байна.

“Эрин зууны бахархал Эрдэнэт” уриан дор тэмдэглэж буй 50 жилийн ойн бүтээн байгуулалтын ажлууд нь зөвхөн баяр наадмын бэлтгэл хангах хүрээнд бус, иргэдийн амьдралын чанарыг дээшлүүлэх, хотын дараагийн 50 жилийн хөгжлийн суурийг бүрдүүлэх урт хугацааны хөрөнгө оруулалт гэдгээрээ онцлог юм.

Ойн баяр наадмын бэлтгэл ажлыг хангах хүрээнд Ёслол хүндэтгэл, хөрөнгө оруулалт, бүтээн байгуулалт, тохижилт, аж ахуйн нэгж байгууллагуудтай хамтран ажиллах, соёл урлаг, спортын арга хэмжээ зохион байгуулах, хэвлэл мэдээлэл, сурталчилгааны чиглэлээр ажиллах дэд ажлын хэсгүүд төлөвлөгөөний дагуу бэлтгэлээ ханган ажиллаж байна.