Өнгөрсөн наймдугаар сарын 6-ны өдрийн Засгийн газрын хуралдаанаар “Эрдэнэт үйлдвэр” ТӨҮГ-ын “Эрдэнэт медикал” эмнэлгийг Хойд бүсийн хавдрын оношилгоо, эмчилгээний дэд төв болгохоор шийдвэрлэсэн билээ.  Монгол Улсын Ерөнхий сайд өнөөдөр Орхон аймагт ажиллаж  дэд төвийн үйл ажиллагааг албан ёсоор нээлээ. 

Хавдар судлал үндэсний төвийн харьяанд  “Эрдэнэт медикал” эмнэлгийг Хойд бүсийн хавдрын оношилгоо, эмчилгээний дэд төв болгон үйл ажиллагааг нь шилжүүлснээр   Орхон, Хөвсгөл, Булган  болон зэргэлдээх бусад аймгийн иргэдэд хавдрын үеийн эмчилгээ, тусламж үйлчилгээг цогцоор үзүүлэх боломж бүрдэж байна. 

Орон нутагт хавдрын тусламж, үйлчилгээ үзүүлэх дэд төвийг байгуулснаар төвлөрлийг сааруулах Засгийн газрын бодлогын хүрээнд Хавдар Судлал Үндэсний төвийн ачаалал, хүлээгдэл 5-10 хувиар буурна гэсэн тооцоолол бий. 

Бүсийн хэмжээнд жилд дунджаар хавдрын 800 орчим шинэ тохиолдол, 500 орчим нас баралт бүртгэгдэж, 3400 гаруй иргэн хяналтад байдаг ажээ. Өвчлөлөөр нь авч үзвэл элэг, ходоод, уушгины хорт хавдар тэргүүлж буйг салбарын эмч нар хэллээ. 

Өнөөдрийн байдлаар “Эрдэнэт медикал” дэд төвд эмэгтэйчүүдийн хавдрын мэргэжлийн эмч ажиллаж байгаа бөгөөд цаашид хими, бай эмчилгээнүүдийг нутагшуулах, хүний нөөцийг бэлтгэхэд анхаарч байгаа талаар  Хавдар судлалын үндэсний төвийн захирал Ц.Батболд хэлж байв.

 Мөн тус төвийн үйл ажиллагааг 2030 он хүртэл үе шаттайгаар  төлөвлөж, Хавдар судлал үндэсний төвийн эмчилгээ, үйлчилгээтэй дүйцэхүйц тусламж үйлчилгээг үзүүлдэг  байх зорилтыг дэвшүүлжээ.   Тухайлбал, 2026 он гэхэд  амбулаторийн тусламж үйлчилгээг 18 кабинетээр үзүүлж, элэг, ходоод, хөх, эмэгтэйчүүдийн дурангийн мэслийг нэвтрүүлэхээр төлөвлөсөн байна. 

Ерөнхий сайд Г.Занданшатар “Эрүүл мэндийн салбарт онцгой анхаарч байна. Хүний хөгжлийн гол тулгуур нь эрүүл бие, саруул ухаан. Тиймээс хүний хөгжил дотроос эрүүл мэндийн салбарыг онцгойлон авч үзэж байна.  Ирэх оны төсвийн төсөлд  эрүүл мэндийн салбарын хөрөнгө оруулалтыг нэмэгдүүлсэн. 2025 онд 238,1тэрбум төгрөгийг эрүүл мэндийн салбарт зарцуулж байсан бол 2026 оны төсвийн төсөлд 1,3 их наяд болгон 5,5 дахин  нэмэгдүүлсэн” гэдгийг онцолж байв. 

Дэд төв нээгдсэнээр..

•  Хорт хавдрын эрт илрүүлгийн хувь нэмэгдэнэ
•  Хүн амын дундаж наслалт уртасна
• Хорт хавдраас шалтгаалсан нас баралтыг бууруулна.
• Орон нутагт хорт хавдрын тусламж үйлчилгээг үзүүлнэ
• ЭМДС-ын санхүүжилт, эдийн засгийн үр ашигтай байдал үүснэ
• Хувь хүн, гэр бүл, нийгэмд ирэх санхүүгийн дарамт буурч, иргэдийн амьдарлын чанар сайжрах гээд олон талын ач холбогдолтой юм.