Монгол Улсад хүүхдийн байгууллага, хөдөлгөөн үүссэн түүхт 100 жилийн ой энэ жил тохиож буй. Орхон аймгийн Хүүхэд, гэр бүл, хөгжил хамгааллын газар эдгээр өдрүүдэд түүхт ойн баяраа тэмдэглэж байна.  Өнөөдөр баярын хүндэтгэлийн хурлаа хийж, хүүхдийн байгууллагын үе үеийн төлөөлөл нэгэн дор чууллаа. 

 Хүүхдийн байгууллага 1925 онд залуучуудын санаачилгаар “Хойчийг залгамжлагч багачуудын холбоо” нэртэйгээр анх байгуулагдсан түүхтэй. Түүнчлэн тухайн үед шинэ үеийн зохиолч Д.Нацагдоржоор удирдуулж, “Бүхий олон багачууд” дууг эгшиглүүлж эхэлснээс хойш тасралтгүй хүүхэд залуусын төлөө ажилласаар 100 жилийн түүхийг бүтээжээ.  
Эрдэнэт хотын Хүүхдийн байгууллагын  түүх 1974 оноос эхтэй. Тухайн оны  есдүгээр сарын 1-нд анхны 8 жилийн сургууль байгуулагдаж, 248 пионерын гишүүнтэй бүлгийн зөвлөл үйл ажиллагаагаа явуулж эхэлсэн гэдэг. 

Аймгийн Засаг дарга, хүүхдийн зөвлөлийн тэргүүн Б.Зоригтбаяр баяр “Хүүхдийн төлөөх үйлсэд төр, иргэний нийгэм, олон улсын түншүүд, эцэг эх, иргэд, олон нийт хамтдаа нэгдэн оролцож чадвал, Монголын ирээдүй улам гэрэлтэнэ. Цаашид бид "Бүх хайраа гэр бүлдээ" төсөл, дөрвөн улирал ажиллах Янзага зуслан, Гэр бүлийн хөгжлийн төв, Хүүхэд хамгааллын түр хамгаалах байр зэрэг томоохон бүтээн байгуулалт, төсөл хөтөлбөрийг хэрэгжүүлэхээр зорьж байна” гэлээ. 

Түүхт ойгоо угтан орон нутгийн төсвийн 1 тэрбум орчим төгрөгийн хөрөнгө оруулалтаар  Янзага зусландаа  иж бүрэн их засвар хийж, өнгө оруулснаар  энэ зун ойрын жилүүдэд байгаагүйгээр хүүхэд, багачуудын хөлд дарагдсан билээ.  Ирэх жилүүдэд дөрвөн улирлын үйл ажиллагаатай болгохоор зорьж буй юм. 

Орхон аймгийн хүүхдүүдийн байгууллаганы түүхээс сонирхуулбал, 

• Монгол Улсын Засгийн газрын  1991 оны 205 дугаар тогтоол, Хүүхдийн төлөө үндэсний газрын даргын 02 дугаар тушаал, Эрдэнэт хотын Ардын депутатуудын хурлын Гүйцэтгэх захиргааны 1991 оны 148-р тогтоолоор  Эрдэнэт хотын “ХҮҮХДИЙН БАЙГУУЛЛАГЫН ЗӨВЛӨЛ”-ийг  “ХҮҮХДИЙН ТӨЛӨӨ ТӨВ” болгон удирдлага зохион байгуулалтад оруулж байжээ. 
• Үүнээс хойш Монгол Улсын Засгийн газрын 2008 оны 67 дугаар тогтоолыг үндэслэн, аймгийн Засаг даргын 2009 оны   79 дүгээр захирамжаар “ХҮҮХДИЙН ТӨЛӨӨ ХЭЛТЭС”, 
• Засгийн газрын 2007 оны 354, 2012 оны “Аймаг, нийслэлийн Засаг даргын харьяа зарим агентлагийн тухай” 32 дугаар тогтоолыг үндэслэн 2013 оны 01 дүгээр сарын 28-нд “ХҮҮХЭД, ГЭР БҮЛИЙН ХӨГЖЛИЙН ХЭЛТЭС” , 
• Засгийн газрын 2016 оны 08 дугаар сарын 3-ны өдрийн 09 тоот тогтоолоор “ГЭР БҮЛ, ХҮҮХЭД, ЗАЛУУЧУУДЫН ХӨГЖЛИЙН ГАЗАР” , 
• Засгийн газрын 2023 оны 10 дугаар сарын 11-ний 378 дугаар тогтоолоор “ХҮҮХЭД, ГЭР БҮЛИЙН ХӨГЖИЛ, ХАМГААЛЛЫН ГАЗАР” болж  өөрчлөгдөн үйл ажиллагаагаа явуулж байна.