Орхон аймгийн Засаг дарга Б.Зоригтбаярын удирдсан өргөтгөсөн шуурхай хуралдаанаар 2026 оны улсын төсөвт тусгагдах хөрөнгө оруулалтын ажлын санал нэгтгэгдэж, ажлын хэсэг байгуулагдсан талаар мэдээлэв. Гэвч хуралдааны үеэр өнгөрсөн онд гарсан алдаа, доголдлыг ирэх жил дахин давтахгүй байхыг онцлон сануулав.

Өнгөрсөн жил олон бүтээн байгуулалтын ажил зураг төсөлд тусгагдаагүй, нэмэлт санхүүжилт шаардсан байдлаар гацаанд орсон. Үүний улмаас төсвийн тодотгол хүлээж хугацаа алдаж, ажлууд он дамжин үргэлжилсэн нь иргэдийн бухимдлыг төрүүлжээ. Зураг төсөл боловсруулалт, газар дээрх хамтарсан үзлэгийг сайжруулж, зурагт тусгагдаагүй ажил дахин гарч ирэхийг таслан зогсоо хэмээн мэргэжлийн байгууллагуудад хатуу санууллаа.

Түүнчлэн шугам сүлжээг засварласны дараах орчны тохижилт орхигдож, явган зам, хүүхдийн тоглоомын талбай эвдэрч үлдэх асуудал давтагдсаар байгааг хурлын үеэр онцлов. Ялангуяа “Эрдэнэт Ус” компанийн жишээг дурьдан, татвар төлөгчдийн мөнгөөр хийсэн тохижилтыг өөрсдөө сүйтгэж үлдээдэг тогтолцоо байж таарахгүй хэмээн шүүмжиллээ. 

Мөн Засаг дарга долоо хоног бүр иргэдтэй уулзаж санал авч байгаа ч, зарим байгууллагын санал шийдвэрийн шатанд орхигдож байгааг онцолж, ирэх долоо хоногт танилцуулах жагсаалтад заавал оруулахыг үүрэгдэв.

2026 оны улсын төсвийн төсөлд аймагтай холбоотой таван хөрөнгө оруулалт тусгагджээ. Үүнд 2а, 7а хорооллын сургууль, цэцэрлэгүүд, Баянбулагийн 16-р сургуулийн спорт заал, спортын төрөлжсөн сургалттай “Ирээдүй Одод” сургуулийн дотуур байрны санхүүжилт орсон байна. Гэвч бусад барилга байгууламжийн төсөв одоогоор төсөлд ороогүй байгаа нь дахин он дамжсан, гацсан ажил давтагдах эрсдэлтэй байна гэлээ. 

Орхон аймгийн бүтээн байгуулалт төлөвлөснөө хэрэгжүүлэхийн оронд алдаагаа засч гүйцээдэг хандлагаас салаагүй нь харагдаж байна. Зураг төсөл дутуу, төсөв бүрэн бус, тохижилт сүйдсэн байдлаар үлдэх нь иргэдийн төлсөн татварын мөнгийг үр ашиггүй зарцуулж буй тод жишээ юм.

Хэрэв энэ тогтолцоо өөрчлөгдөхгүй бол ирэх жилүүдэд ч он дамнасан ажил, дутагдсан төсөв гэсэн шалтаг давтагдсаар, орон нутгийн хөгжил хүлээсэн иргэд хохирч үлдэх нь тодорхой байна.