Аймгийн ИТХ-ын Төлөөлөгч С.Ганцогт өнөөдөр VII хорооллын төлөвлөлттэй холбоотойгоор холбогдох албаны хүмүүстэй уулзаж, нээлттэй хэлэлцүүлэг зохион байгууллаа. VII хорооллын хэсэгчилсэн ерөнхий төлөвлөлтөд 2015 онд тодотгол хийж, 2016 оноос төсөл сонгон шалгаруулах болон дуудлага худалдаагаар газар олголт хийгджээ. Төлөвлөлтийн хугацаанд VII хороололд шинээр 2172 өрхийн 206.8 мянган м2 талбай бүхий 9-12 давхар орон сууц, 16710м2 талбай бүхий худалдаа ахуйн үйлчилгээ, 880м2 суурийн талбай бүхий ЖДҮ-ийн зориулалтын барилга, 960 хүүхдийн сургууль, 150 хүүхдийн цэцэрлэг  баригдахаар төлөвлөсөн. 

Өнөөдрийн байдлаар ашиглалтад орсон  9, баригдаж буй 7 компанийн орон сууцны барилгын ажил тус байршилд үргэлжилж байна. 

Тус хороололд шинээр баригдаж буй барилгууд олон компанийн төсөл хэрэгжиж байгаатай холбоотойгоор загвар өөр, хороолол доторх зам стандарт бус, барилгын ажлын шороог зөөвөрлөөгүйн улмаас сургуулийн барилгын ажил удааширч байгаа зэрэг олон шалтгааны улмаас уг хэлэлцүүлгийг зохион байгуулсан юм. 

Албаныхан эхэнд газар авсан барилгын компанийн төлөөлөл инженерийн дэд бүтцийн барилгын холболтыг өгдөггүй, барилга болоод замын өндөржилтийг нарийн тооцоогүй, эхний барилгын компаниуд барилгын шороогоо зөөж газраа суллаагүй зэрэг олон бэрхшээлийн улмаас дараа дараагийн барилгын ажил өрнөхөд хүндрэлтэй байгааг хэлж байна. 

Хэлэлцүүлгээс

• хороолол доторх замын ажлын зургуудыг нэгтгэж, шинээр тавьж буй бүх замд үерийн сувагчлал гаргах, 
• тус хороололд архитекторын даалгавар авч хэрэгжиж буй орон сууцны хорооллын төсөл тус бүрээр загвар зураглалыг сонгогдсон төлөөлөгч нарт нээлттэй мэдээлэл өгөх, 
• барилга, замын өндөржилтийн зөрүү гаргахгүй байхад хяналтыг эрчимжүүлэх, 
• хэсэгчилсэн төлөвлөлтийг алдагдуулахгүй байхад анхаарах зэргийг хэлэлцүүлэг зохион байгуулсан төлөөлөгчдийн зүгээс албаныханд даалгалаа. 

Хэлэлцүүлэгт аймгийн ИТХ-ын дарга Д.Мөнхбат, Засаг дарга Б.Зоригтбаяр, Оюут багаас сонгогдсон төлөөлөгч Д.Мөнхболд нар оролцож, 1а, 2а хороололд мөн адил 7а хорооллын төлөвлөлт, гүйцэтгэл дээр тулгарч буй асуудал гарч буйг хэлж, мэдээллийг нээлттэй тавьж, хот төлөвлөлөө барьж ажиллахыг сануулсан  юм.