Орхон аймгийн ИТХ-ын ээлжит бус I хуралдаанаар Их залуу баг орчмын  хэсэгчилсэн ерөнхий төлөвлөгөөг хэлэлцэн баталлаа. Их залуу баг нь гэр хорооллын Яргуйт, Шанд, Рашаант, Уртын гол багуудтай хиллэдэг,  газар хөдлөлийн 7 баллын бүс,  дунд хэлбэрийн төвөгшилтэй талбайд хамаардаг.  

 Тус багийн  244 нэгж талбарыг хамарсан, 40.8 га газарт дахин төлөвлөлт хийхээр баталж байна. Шинээр төлөвлөж буй хэсэгт хөрс болон агаарын бохирдлыг бууруулах зорилгоор дахин төлөвлөн, барилгажуулахаар төлөвлөсөн бөгөөд инженерийн шугам сүлжээ, ус дулаан, цахилгаан, шилэн кабелийн нөөц, нөхцөл боломжийг тодорхой зааж өгсөн юм. Тус багийн 40.8 га газарт 

• Орон сууцны бүс 15.2 га, 
• сургууль, цэцэрлэгийн бүс 5 га, 
• худалдаа, үйлчилгээний бүс 5.3 га, 
• засаг захиргааны бүс 0.96 га,
• нийтийн эзэмшлийн ногоон байгууламж 4.9 га
• хязгаарлагдмал хэрэгцээний ногоон байгууламж 20.9 га газарт байхаар төлөвлөсөн бөгөөд гол зам 3.6 км, хороолол доторх зам 1.2 км, нутаг дэвсгэрийн туслах зам 2.2 км байхаар тооцоолоод байна.

Дахин төлөвлөлтөд 1200 хүүхдийн ЕБС, 240 хүүхдийн цэцэрлэг, баг, өрхийн эмнэлэг, цагдаа, үзвэр худалдаа үйлчилгээний цогцолбороос гадна 6,9 давхар 3200 айлын орон сууцны барилгын ажил багтаж байна. Их залуу баг орчмын дахин төлөвлөлтийн 2042 он хүртэл баримталж, хэрэгжүүлэх юм.   Төлөөлөгчдийн зүгээс хэсэгчилсэн ерөнхий төлөвлөгөөг батлах төлөвлөлтийн тогтоолыг 82 хувийн саналаар баталсан бөгөөд газар чөлөөлөх, дэд бүтэц байгуулах, сургууль, цэцэрлэгийн барилга буюу нийгмийн дэд бүтцийн байгууламжуудыг нэн тэргүүнд эхлүүлэхээр тогтоолын төсөлд тусган баталлаа.