Эрдэнэтэд 800 орчим Казах үндэстэн ажиллаж, хөдөлмөрлөн амьдардаг. Иймээс Наурызын баяраар   “Бүргэдийн баяр-2023” арга хэмжээг аймгийн ЗДТГ, Баян-Өлгий аймгийн нутгийн зөвлөлтэй хамтран зохион байгуулах гэж байна.  Баярын үеэр Казах түмний ёс заншил, өв уламжлал, соёлыг олон нийтэд сурталчилан таниулахыг зорилгоо болгожээ.   Юнескогийн Соёлын биет бус өвд 2010 онд албан ёсоор бүртгэгдсэн уг соёл, уламжлал нь  "Махчин шувууг гаршуулан сургаж, ан ав хийж ирсэн уламжлалт арга ухаан" бөгөөд “Шувуучлахуй” хэмээн нэрлэдэг.  Бүргэдийн баярыг тэмцээн, уралдааны хэлбэрээр зохион байгуулдаг уламжлалтай. Энэ удаад манай аймагт зохион байгуулахад ч мөн уламжлалаа хадгалан, бүргэдчид үндэсний хувцсаараа гоёж, гаршуулсан бүргэдээ гарын шуун дээрээ суулгаж, бүргэдээр ан хийхэд тусгайлан сургасан морьдтойгоо оролцох юм.  Мөн сургасан бүргэдээр  ангийн чихмэл бариулах, морьт эрчүүд тулам булаалдах гэх зэргээр тэмцээн үргэлжилж, шилдгүүдээ тодруулна. Тэмцээн энэ сарын 18-ны өдөр болно.