Орхон аймгийн Засаг дарга С.Батжаргал иргэдийн санал хүсэлтийг сонсч тэдэнд тулгамдаад буй гол асуудлуудыг шийдвэрлэх зорилгоор Баян-Өндөр, Жаргалант сумын 25 багийн 1300 гаруй иргэдтэй цахимаар уулзалт хийлээ.           4 дүгээр сарын 02-ноос 4 дүгээр сарын 20-ны өдрийг хүртэл нийт 13 удаагийн цахим уулзалтад 400 гаруй асуулт, санал, хүсэлтийг иргэдээс ирүүлсэн байна.          Цахим уулзалтанд аймгийн Засаг даргын орлогчид, ЗДТГ-ын холбогдох хэлтсийн дарга нар,  Хотын  захирагчийн алба,  Баян-Өндөр, Жаргалант сумын болон багийн Засаг дарга нар,  “Эрдэнэт ус, дулаан түгээх сүлжээ” ОНӨХК зэрэг холбогдох байгууллагын удирдлагууд оролцов.       Уулзалтын үеэр иргэдээс тавьж буй асуудлын дийлэнх нь хөрөнгө оруулалтын ажлууд, тохижилт, гэрэлтүүлэг, камержуулалт, худаг ус, авто замтай холбоотой хүсэлтүүд байсан бөгөөд өөрийн багийн онцлог, багт тулгамдаж буй чухал асуудлыг шийдвэрлүүлэх саналаа нэн тэргүүнд илэрхийлж байлаа.         Тухайлбал: Жаргалант суманд уурын зуух, хүнсний ногоо хадгалах зоорь, хүлэмж, инженерийн шугам сүлжээний асуудал, Баян-Өндөр сумын орон сууцны хорооллуудад байруудын дээвэр, фасадны засвар, орцны хаалга, цэвэрлэгээ, ариутгал зэрэг сууц өмчлөгчдийн холбоодын үйл ажиллагаа, ажлын хариуцлагатай холбоотой гомдол саналуудыг иргэд хэлж байсан юм.       Түүнчлэн машины зогсоол, камержуулалт, хүүхдийн тоглоомын талбайг засч янзлах, гэр хорооллын багуудад гудамжны гэрэлтүүлэг, камержуулалт, нийтийн тээвэр, худаг, усан сан, хог ачилт, замын орц, гарц, үерийн суваг, айл өрхүүдийг дулааны шугамд холбох зэрэг хөрөнгө оруулалтын ажлуудын талаар нийтлэг асуулт, саналууд гарсан бөгөөд аймаг орон нутгийн удирдлагууд тухай бүрт хариулт өгч ажиллалаа.        Уулзалт бүрээс гарсан асуудлуудыг шийдвэрлэхээр баг тус бүрээр төлөвлөгөө гарган холбогдох байгууллага, албан тушаалтнуудад үүрэг даалгавар өгч, энэ жил Жаргалант суманд Агропарк байгуулах, 2-34-р байрны гадна фасадыг засварлуулах хөрөнгийг ирэх жилийн төсөвт тусгах, гэрэлтүүлэг, зам засвар, камержуулалт, хүүхдийн тоглоомын талбай, ундны усны худаг, гэр хорооллыг орон сууцжуулах зэрэг ажлуудыг үе шаттайгаар хэрэгжүүлэн ажиллах болно гэдгийг аймгийн Засаг дарга С.Батжаргал мэдэгдлээ. Мөн  нийт Сууц өмчлөгчдийн холбоодыг иргэддээ цахимаар ажлын тайлангаа тавих үүрэг өгөв.          Цар тахалтай тэмцсэн хүнд цаг үед төрийн ажлыг орхигдуулалгүй технологийн шийдэл ашиглан цахим уулзалт зохион байгуулж байгаад талархалтай байгаагаа иргэд илэрхийлж байлаа.   Мэдээллийн төв  Мэдээллийн төв