Монгол марк 1924 онд хэвлэгдэж, тэр жилдээ дэлхийн маркын бүртгэлд орж байсан түүхтэй. Марк бол аливаа улс орны тусгаар тогтнолын илэрхийлэл, түүхийн үнэт соёл байдаг. Тиймдээ ч Монгол марк дэлхийд хэдэн тэрбум доллараар үнэлэгдэж, марк цуглуулагчдын тоо олширсоор байгаа билээ.   Тэгвэл Ардын хувьсгалын түүхэн яруу алдарт 100 жил, МАН тулгын чулуугаа тавьж, төр түмнийхээ төлөөх үйлсээ эхлүүлсэн 100 жилийн ой тохиож буй энэ өдөр Орхон аймгийн МАН-ын хорооноос  “Марканд мөнхөрсөн Д.Сүхбаатар” марк, мөнгөн тэмдэгтийн үзэсгэлэн зохион байгууллаа. Үзэсгэлэн төр, нийгмийн нэрт зүтгэлтэн, цогтой тэмцэгч Дамдины Сүхбаатарын мэндэлсэн өдөртэй давхцаж буй.         Тус үзэсгэлэнд Монгол марк цуглуулагчдын нэг “Эрдэнэт өв” ТББ-ын тэргүүн Б.Мажинбуу нийт цуглуулгынхаа 1\/8 хувийг буюу МАН-ын үүсгэн байгуулагч, цогтой тэмцэгч, ард түмний хайртай хүү Дамдины Сүхбаатарын дүрээр мөнхөрсөн марк, мөнгөн тэмдэгтээ дэлгэсэн нь онцлог байлаа.            “Марканд мөнхөрсөн Д.Сүхбаатар” үзэсгэлэн энэ сарын 5-ныг дуустал Орхон аймгийн МАН-ын хорооны байранд үргэлжилнэ.