Орхон аймгийн Бүсийн оношилгоо эмчилгээний төвийн Цусны салбар төвд нөөцийн хомсдол үүсээд байна. Цусны нөөцийг сайн дурын донор болон явуулын донорын тусламжтайгаар бүрдүүлдэг. Коронавируст халдвартай холбоотойгоор албан байгууллагуудад явуулын донороор цус авах боломжгүй болжээ. Мөн сайн дураар цусаа бэлэглэх донорын тоо ч буурсан аж. Цусны хомсдол үүссэн талаар тус төвийн эмч С.Бадрал “ Хөлдүү сийвэнг нэгээс дээш жил хадгалдаг учир хомсдол харьцангуй бага байна. Харин улаан эсийн бүтээгдэхүүний хугацаа 42 хоноод дуусдаг тул хомсдол үүссэн. Бид төрөл төрөгсдийн донороор нөөцөө бүрдүүлэх гэж хичээж байна” гэж тайлбарлав. Төрөхийн үед, бэртэл гэмтэл, мэс засалд “яаралтай нөөц” шаардлагатай байдаг байна. Цусны нөөцийн хомсдол үүссэн үед цусаа бэлэглэхийг хүсвэл тус төв ажлын таван өдөр 8-12 цаг хүртэл ажиллаж байна. Нэг удаа цусаа өгснөөр гурван хүний амь аварна гэж  ярьдаг билээ.  Цусаа өгөхийн өмнө дараах зүйлсийг анхаарах хэрэгтэйг эмч зөвлөж байна. -Урьд өдөр нь сайн унтаж амрах -Хувийн ариун цэвэр сайн сахих -Өөх тостой хоол, сvv сvvн бүтээгдэхүүн, айраг, архи, пиво, тамхи, эм бэлдмэл хэрэглэхгүй байх хэрэгтэй. -Цус өгөхөөс өмнө ердийнхөөс илүү их шингэн ууна. -Цус өгөх өдрийн өглөөний цайндаа хөнгөн хоол хүнс \/чихэртэй цай, мантуу, талх, өндөг, цагаан будаа\/ хэрэглэнэ.