МЭНДЧИЛГЭЭ

Монголчууд хүүхдээ эхийн хэвлийд байхаас хамгаалан хүндэтгэж, төрөх хүүхдээ эрүүл саруул, амар тайван, зөв сайхан зан чанартай эх оронч сэтгэлгээтэй байлгахыг эрхэмлэж ирсэн уламжлалтай. Дэлхий даяаршиж, өдрөөс өдөрт гадны соёлын нөлөө эрчимжиж хотжих болсон энэ цаг үед ирээдүйн хүүхэд багачууд монгол ахуйгаа танин мэдэх, түүгээрээ бахархах, өвлөн авч үлдэх зайлшгүй шаардлага бий болоод буй. Хүүхдийн эрх, эрх чөлөө хэрхэн хангагдаж, тэдний хөгжил, төлөвшил ямар байгаагаар тухайн улс орон, байгууллага, гэр бүлийн хөгжлийн түвшнийг тодорхойлон харж болдог. Тиймээс Монгол Улсын өнөөдрийн өнгө, маргаашийн хөгжлийн төрх болсон хүүхэд бүрийн сайн сайхны төлөө төр, иргэний нийгмийн байгууллага, олон улсын байгууллага, хүүхдийн асуудлыг хамаарах бүхий л салбар, гэр бүл, эцэг эх, олон нийт бүгдээрээ хамтран ажиллаж илүү их амжилтад хүрнэ гэдэгт итгэл дүүрэн байна.   ЭРДЭНЭТ ХОТЫН ЭРДЭНЭС БОЛСОН ХҮҮХЭД БАГАЧУУД ТА БҮХЭНДЭЭ ОЛОН УЛСЫН ХҮҮХДИЙН ЭРХИЙГ ХАМГААЛАХ ӨДРИЙН БАЯРЫН МЭНД ХҮРГЭЕ.