Эрдэнэт үйлдвэрийн ажилчдын цалинг 10 хувиар нэмэхээр боллоо

 “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн уурхайчдын төлөөлөлтэй уулзах үеэр цалин нэмэх талаар ярилаа. Тодруулбал, ирэх 6-р сарын 1-ний өдрөөс үйлдвэрийн ажилчдын үндсэн цалинг 10 хувиар, ахмадуудын тэтгэмжийг 40 хувиар нэмнэ гэдгийг мэдэгдсэн юм. Коронавирусийн цар тахлын үед гарч байгаа эдийн засгийн хямралын үед ажилчдынхаа цалинг нэмж байгаа таатай мэдээллийг хүргэлээ.  Өнөөдрийн байдлаар Эрдэнэт үйлдвэрийн уурхайчид улс орны төсөвт 230 тэрбум төгрөгийг төвлөрүүлээд байна. Тавдугаар сарын эхний 20 хоногт үйлдвэрлэлийн төлөвлөгөөг бүх үзүүлэлтээр нь 100-аас дээш хувиар биелүүлжээ.  Тун саяхан МҮХАҮ-ийн танхимаас уламжлал болгон явуулдаг “Топ 100” аж ахуйн нэгжийг 18 дахь удаагаа тэргүүлсэн.  Эрдэнэт үйлдвэрийн Ерөнхий захирлын санаачилгаар “Топ 100” аж  ахуй нэгжийн эхний 10 байрт шалгарсан компаниудын төлөөллийг энэ сарын 29-нд үйлдвэртээ урьж, уулзалт зохион байгуулахаар болжээ.