Дэлхий дахинд тархаад буй коронавирусийн халдвараас сэргийлж, Орхон аймагт хоёрдугаар сарын 14-ний өдөр Шуурхай штабыг байгуулсан.  Цар тахлын үед байнгын бэлэн байдалд ажиллаж байгаа төрийн албан хаагчдад зориулан хандив тусламж ирсээр байна. Хандив тусламжинд ерөнхий боловсролын сургуулийн сурагчид хамрагдаж байна. Орхон Эмпати сургуулийн сурагчид 500 ширхэг амны хаалтыг оёж, аймгийн онцгой комисст өглөө. Тус сургуулийн захиргаанаас  “Нэг гэр бүл-Нэг сэтгэл” аяныг багш, эцэг эх, сурагчдын дунд зарлажээ. Сурагчид технологийн хичээл дээрээ амны хаалт оёхыг сурсан байна. Тэд онцгой нөхцөлд ажиллаж байгаа албан хаагчдад сэтгэлийн үгтэй захидал бичиж, зураг зурж  илгээжээ.  Орхон аймгийн онцгой комисс өндөржүүлсэн бэлэн байдалд ажиллаж эхэлснээс хойш 11 удаа хуралдсан байна. Энэ хугацаанд зорчих тээврийн хөдөлгөөнийг хоёр удаа хязгаарлажээ.  Засаг даргын захирамжаар бүх нийтийн ариутгал, халдваргүйтгэлийг үе шаттайгаар явуулж байна. Энэ ажлын хүрээнд хоёр өдрийн турш бүх нийтийн их цэвэрлэгээгээр хотоо ариутгаж халдваргүйжүүлсэн юм.