Вирусын халдвараас урьдчилан сэргийлэх үүднээс авто тээвэр болон иргэдийн хөдөлгөөнийг хориглосон тул түлшний модны хомсдол үүсч болзошгүй тул арга хэмжээ авч ажиллахыг холбогдох сумдын Засаг дарга нарт аймгийн Засаг дарга Д.Батлут шуурхай хуралдаанаар үүрэг болголоо. Өнөөдрийн байдлаар Булган аймгийн Сэлэнгэ, Бугат, Орхон сумдаас түлшний модны эрхийн бичиг олгож, “Буянт хангай”, “Бугат”, “Өндөр буурал”, “Хялгант амьдрал”, “Хангал Сэлэнгэ” зэрэг модны захуудаар худалдан борлуулж байна. Үнийн тухайд 6 дэгээт портер мод 260 000-275 000 төгрөгийн ханштай байгааг  Баян-Өндөр сумын Засаг дарга С.Ганцогт мэдэгдлээ.  “Бугат” модны зах 800 м.куб, “Буянт хангай” модны зах 320 м.куб, “Өндөр буурал” модны зах 120 м.куб модны нөөцтэй байгаа аж.   Шуурхай хуралдаанаар дээрхээс гадна өндөржүүлсэн бэлэн байдлын үед хууль тогтоомж зөрчсөн, зөвшөөрөлгүй хурдан морины уралдаан зохион байгуулсан зөрчилд прокурорын зөвшөөрлөөр зөрчлийн хэрэг нээн уралдааныг зохион байгуулсан, оролцсон 4 иргэнд хяналт шалгалт явуулж байгаа бөгөөд нэг иргэнд нэг зуун тавин нэгжтэй тэнцэх хэмжээний торгууль оногдуулсан.   Цагдаагийн газраас “Шүр” дэн буудлын үйл ажиллагаанд хяналт шалгалт явуулж, үйл ажиллагааг нь зогсоож, холбогдох ажилтанд торгуулийн арга хэмжээ авсан. 3-р бичил хорооллын 11 дүгээр байранд үйл ажиллагаа явуулж байсан биллъярд тоглоомын газрын үйл ажиллагааг хаасан талаарх мэдээллийг холбогдох албан тушаалтнууд хийв.