Жаргалант сумын уурын зуух өнгөрсөн долоо хоногийн Мягмар гарагийн 16 цаг 30-19 цаг 20 минут хүртэлх хугацаанд түр зогсолт хийжээ. Түр зогсолт нь уурын зуухны насост гэмтэл гарсантай холбоотой аж. Үүнтэй холбоотойгоор  16-нд Жаргалант сумын Онцгой комисс хуралдаж, дулаан хангагч “Бэрх оньс” ХХК-тай хамтран ажиллах гэрээг түр цуцалжээ. Иймд хоёрдугаар сарын нэгнийг хүртэл Жаргалант сумаас хариуцлагатай жижүүр томилон, уурын зуухны хэвийн ажиллааг хангахаар болсон байна. Энэ талаар өнөөдөр Аймгийн Засаг даргын шуурхай хуралдаанд Жаргалант сумын Засаг даргын орлогч Б.Учрал мэдэгдлээ. Тэрээр мөн “Бэрх оньс” ХХК хуримтлагдсан өр төлбөрийн асуудлыг ч дурдсан юм. Орхон аймгийн Засаг дарга Д.Батлут: Дөн өвлийн хүйтнээр дулаан хангагч ХХК-ийн гэрээг цуцлах нь зохисгүй гэдгийг хэлээд, аймгийн онцгой комиссын ажлын хэсэг нөхцөл байдал, сумаас гаргасан шийдвэрийг эргэн хэлэлцэхийг үүрэг болголоо.  “Бэрх оньс” ХХК-ийн захирал З.Базарсадаас тодруулахад: Уурын зуух нь төсвийн 6 байгууллага, орон сууцны 186 өрх, 4 ААН-ийг дулаанаар хангадаг. ХХК-ийн зүгээс 15 хүнийг ажлын байраар ханган ажилладаг. Энэ сарын 15-ны өдрийн түр зогсолтын тухайд шуурхай арга хэмжээ авч, шийдвэрлэсэн гэлээ. Мөн тэрээр өр төлбөрийн асуудал бий. Одоогоор “Эрдэнэт-Ус” ОНӨҮГ, “ЭБЦТС” ТӨХК, нийгмийн даатгалд нийт 38 сая орчим, нүүрсний 40  сая төгрөгийн үлдэгдэл өр бий. Энэ нь өвлийн улиралд дийлэнх санхүүжилтээ нүүрсэнд зориулдагтай холбоотойгоор үүсдэг. Бид 2,3-дугаар саруудад нөхөн төлөх бүрэн боломжтой гэсэн юм.