Аймгийн Засаг даргын санаачилгаар байгуулагдсан “Эрдэнэт Шинжлэх ухаан технологийн парк” ОНӨААТҮГ гагнуурын электродын үйлдвэр байгуулж олсон ашгаа өрхийн болон ЖДҮ эрхлэгчдэд зээл хэлбэрээр олгох ажлыг хоёр дахь удаагаа зохион байгуулж байна. Тодруулбал, энэ удаад Эрдэнэт ШУТП-ийн ашиг 122 сая төгрөгийг 61 иргэнд олгох ажлын шалгаруулалтыг өнөөдөр эхлүүллээ. Эдгээр иргэдэд 2 хүртэлх сая төгрөгийг эргэн төлөгдөх нөхцөлтэй, хүүгүй, барьцаагүй хэлбэрээр 24 сарын хугацаатай олгоно. “Эрдэнэт ШУТП”-аас зээл авах хүсэлтэй иргэдийн төслийг 9-р сарын 27-ны өдрөөс 10-р сарын 27 хүртэл ажлын бүх өдөр хүлээн авч, нийт 150 иргэн төсөл ирүүлсэн байна. Зээлийн танилцуулга үйл ажиллагааг Баян-Өндөр, Жаргалант сумын бүх багт зохион байгуулсан юм.    Дашрамд дурдахад, “Эрдэнэт ШУТП” нь 2018 онд 140 сая төгрөгийн цэвэр ашигтай ажиллаж,  “Эрдэнэт үйлдвэр”-ийн электродын хэрэгцээг 100 хувь хангаж байна. Дээрх ашгаа бичил болон өрхийн үйлдвэрлэл эрхлэгч 19 иргэнд хоёр сая төгрөг буюу нийт 38 сая, хамтарсан үйлдвэр байгуулах хоёр төсөлд нийт 100 сая төгрөгийн хөрөнгө оруулалт хийгээд буй.   Түүнчлэн хэд хэдэн үйлдвэрийн судалгаа хийж байна. Судалгааны дүнд Эрдэнэт хотын дэд бүтэц, эдийн засгийн нөөцөд тулгуурлаж 50 орчим үйлдвэрийг шинээр байгуулж хөгжүүлэх боломжтой гэж үзсэн аж.  Эдгээрээс эхний ээлжинд 6 үйлдвэрийг цогцолбор хэлбэрээр хөгжүүлэхээр төлөвлөн,  үйлдвэр барих 10 мянган м.кв газрыг орон нутгаас Эрдэнэт шинжлэх ухаан технологийн паркт олгоод байна.