Улаанбаатар хот дахь Орхон аймаг Эрдэнэт хотын нутгийн  зөвлөл нь Эрдэнэт хотоос төрөн гарсан амжилттай яваа үе үеийн бизнесмен, залгамж хойч үеийн залуусыг төрөлх хотын хөгжилд уриалан дуудаж, нэгтгэсээр ирсэн.  Тус нутгийн зөвлөлөөс энэ удаад нэгэн үеийн залуусын дунд сагсан бөмбөгийн тэмцээн  Эрдэнэт хотноо анх удаа зохион байгууллаа. Тэмцээнд Улаанбаатар хотод ажиллаж амьдардаг Эрдэнэтээр овоглох 50 гаруй бизнес эрхлэгч, Эрдэнэтэд ажиллаж амьдардаг 1991-2000 оны төгсөгчдийн нийт 21 багийн тамирчид 2 өдрийн турш өрсөлдөж,  аваргуудаа шалгарууллаа.  Улаанбаатар дахь Эрдэнэтийн иргэд, нутгийн зөвлөлийн тэргүүлэгч гишүүд нь төрөлх Эрдэнэт хотоо зорин ирсэн нь дан ганц тэмцээнд  оролцох бус, нутгийн хөгжлийн чиг хандлагын талаар аймгийн удирдлагуудтай уулзаж санал солилцох байсан гэлээ. Тухайлбал Эрдэнэтийг цахиурын хөндий болох, Дата бааз байгуулах, Залуусын хотын  шинэ өнгө төрх бий болгох, Шинэ инноваци, Технологийг нэвтрүүлэх боломжтойг аймгийн удирдлагуудтай уулзаж танилцууллаа. Тус арга хэмжээ нь тэмцээн гэхээсээ илүү төрөлх нутагтаа, үе тэнгийнхнээрээ цуглан, орон нутгийн цаашдын хөгжил өөд хэрхэн хувь нэмрээ оруулах талаар зөвлөлдсөн өндөр ач холбогдолтой томоохон хэмжээний уулзалт болсоноороо онцлог байсан юм. Дараагийн удаад 2001-2005 оны төгсөгчдийн дундах тэмцээн зохион байгуулах, Орхон аймаг Эрдэнэт хотоор овоглосон олны танил эрхмүүдийн "Алдрын багана"-ыг бий болгох зэрэг ажлуудыг төлөвлөөд буйг холбогдох албаныхан мэдээлж байлаа.