“Өндөр ёс зүйтэй өөдрөг иргэд" дэд хөтөлбөр нь Иргэд нийгмийн  ёс зүйг дээдэлсэн, өөрийн хотын үнэт зүйлсээр бахархдаг,  хүүхэд залуучуудыг  эерэг харилцаа, хандлага  бүхий ухамсарт зан үйлд суралцуулахад гол зорилго  чиглэгдэх юм.  Үүний тулд нийгэмд  ёс зүйг дээдлэх, харилцаа хандлагад эерэг өөрчлөлт гарах олон талт ажил  үйлсийг дэмжих, Монгол хүний амин \/давуу\/ чанарыг эрхэмлэж, үндэсний ёс заншил, уламжлалыг түгээн дэлгэрүүлэх, иргэдийн аж төрөх байдалд “Хотын соёл- Хамтын соёл” хэм хэмжээг төлөвшүүлэх гэсэн 3 зорилт тавин ажиллана. Ингэснээр Орхон аймгийн 100 гаруй мянган хүн амын дунд ухамсарт зан үйлийг эрхэмлэдэг үзэл хандлага нэмэгдсэн байх, Гэр бүлийн үнэ цэнэ, үүрэг хариуцлагын талаарх иргэдийн ойлголт нэмэгдэж, хандлагад эерэг өөрчлөлт гарсан байх, Замын хөдөлгөөнд соёлтой оролцдог, олон нийтийн газар биеэ зөв авч явдаг иргэд болон  соёлч боловсон үйлчилгээтэй байгууллагын талаарх олон нийтийн сэтгэл ханамж дээшилсэн байх, Эрүүл, аюулгүй, орчин үеийн “Цэвэр хот”-ыг бий болгох  үйлсэд бүх нийтийн оролцоо, санаачилга нэмэгдсэн байх эерэг үр дүн гарна гэж хөтөлбөр боловсруулагчид үзжээ. Хөтөлбөрт аймгийн бүх төрийн байгууллага болон  төрийн бус байгууллага, аж ахуйн нэгж, хамт олон, иргэд хамрагдах юм. Тэргүүлэгчдийн зүгээс хөтөлбөрийн талаар тодорхой мэдээлэл авсанаар  “Өндөр ёс зүйтэй өөдрөг иргэд” дэд хөтөлбөрийг хэрэгжүүлэх ажлыг зохион байгуулж, шаардагдах хөрөнгийн эх үүсвэрийг жил бүрийн орон нутгийн төсөвт тусган батлуулж, биелэлтийн явц, үр дүнг жил бүрийн 3 дугаар сард аймгийн ИТХ-ын Тэргүүлэгчдэд танилцуулж байхаар боллоо. ИТХ-ын Тэргүүлэгчдийн VI хуралдаанаар дээрх дэд хөтөлбөрөөс гадна ээлжит хуралдаан зарлах тухай, Нэршил өөрчлөх тухай, Аймгийн 2019-2020 оны хотын болон хөдөө аж ахуйн өвөлжилтийн бэлтгэл хангах арга хэмжээний төлөвлөгөө батлах тухай, “Сүм хийдийн үйл ажиллагаа явуулах зөвшөөрлийн хугацаа сунгах тухай, Шагналд тодорхойлох тухай, Бусад гэсэн асуудлуудыг хэлэлцсэн юм.