Орхон аймгийн Засаг дарга Д.Батлутын санаачилгаар сурагчдын бүтээлийг үнэлэх, хүүхдийг багаас нь хэрэглэгч бус үйлдвэрлэгч болох хандлагыг төлөвшүүлэх зорилгоор бүтээлч хүүхдүүдийн “Бизнесийн гараа” үзэсгэлэн худалдааг зохион байгууллаа. Тус үзэсгэлэнд бүтээлээ дэлгэсэн 244 хүүхдийн гар урлал, уран зураг, цаасан болон эсгий урлал, хайчилбар, шүр модон урлал,  бусад бүтээлийг нийт 13.9 сая төгрөгөөр худалдан авч. аймгийн бэлэг дурсгалын багцад төвлөрүүллээ. Тус арга хэмжээг 2 дахь жилдээ зохион байгуулж буй бөгөөд, сурагчид хийж урласан бүтээлдээ зарцуулсан оюун  ухаан, цаг зав, материалын үнэ өртгөө шингээж, худалдаа хийж, бизнесийн анхны гараагаа эхлүүлэн, өөр өөрсдийн нэр дээр “Саятан” хадгаламжтай болж байна. Харин тус үзэсгэлэнг үзэж сонирхсон, худалдан авагчид, орон нутгийн удирдлагуудын зүгээс сурагчдын бүтээл өмнөх жилээс илүү чанаржиж, хүсэн хүлээдэг арга хэмжээний нэг болж байгааг онцолсон юм. Сурагчид өөрсдийн авъяас чадварыг хөгжүүлэхээс гадна, илүү сурч мэдэх хүсэл тэмүүлэлтэй болж, өөрсдийн хийсэн бүтээлээ үнэлүүлэх, урамших, бүтээлч сэтгэлгээгээ хөгжүүлэх, санхүүгийн сахилга батад суралцах гээд олон давуу талтай юм