Орхон аймаг хаврын их ажлын өмнөх  газар тариалан, мал аж ахуй, жижиг дунд үйлдвэрлэл, мал эмнэлэг, хүнсний чиглэлээр үйл ажиллагаа явуулдаг иргэд, аж ахуйн нэгж, байгууллагуудын зөвлөгөөнөө зохион байгууллаа. Зөвлөгөөнийг Орхон аймгийн Засаг даргын Тамгын газар, Хүнс Хөдөө Аж Ахуйн газраас хамтран зохион байгуулж, нээлтийн үйл ажиллагаанд Орхон аймгийн ИТХ-ын дарга П.Пүрэвлхагва, Орхон аймгийн Засаг дарга Д.Батлут, Орхон аймгийн Засаг даргын орлогч А.Түвшинжаргал, С.Батжаргал, ЗДТГ-ын Хөрөнгө оруулалт хөгжлийн бодлого төлөвлөлтийн хэлтсийн дарга Ц.Баяржаргал, аймгийн ХХААГ-ын дарга Ж.Бат-Өлзий, Баян-Өндөр сумын Засаг дарга С.Ганцогт, Жаргалант сумын Засаг дарга Б.Зоригтбаяр нар оролцлоо. Энэ үеэр ХХААХҮЯам, Мал эмнэлгийн ерөнхий газар, Орхон аймгийн ХХААГ, МЭЕГ, Ус цаг уур орчны шинжилгээний төв, МХГ, Баян-Өндөр, Жаргалант сумд 2018 онд хийж хэрэгжүүлсэн ажил болоод 2019 онд хийгдэх ажлын төлөвлөгөөг танилцуулж, иргэдэд мэдээлэл хүргэсэн юм. Түүнчлэн зөвлөгөөнд малчид, тариаланч, хүнс, хөнгөн үйлдвэрлэл,  жижиг дунд үйлдвэрлэл, мал эмнэлгийн салбарын 400 гаруй иргэн оролцсон бөгөөд нийт 50 гаруй иргэдийн асуултад ХХААХҮЯ, аймаг, сумдын болон холбогдох газрын удирдлага, мэргэжилтнүүд хариулт өглөө. Зөвлөгөөнд оролцогчдоос малын удмыг сайжруулах нэгдсэн төв байгуулах, Малын үржлийн үзэсгэлэн худалдааг зохион байгуулах, газар тариаланд ашигтайгаар биологжсон үйлдвэрлэлийг хөгжүүлэх, мөн хотын статусын асуудлыг яаралтай шийдвэрлэх, цаашлаад газар нутгаа тэлж малчид өөрийн нутаг дэвсгэрт бэлчээрлэх боломжтой болох зэрэг саналуудыг зөвлөгөөнд оролцогчид гаргалаа. Энэ жилийн тухайд Баян-Өндөр, Жаргалант сумдуудад орон нутгийн хөрөнгө оруулалтаар сүүний үйлдвэр ашиглалтад оруулах болоод буй.