Орхон аймгийн 2026 оны хөгжлийн жилийн төлөвлөгөөг хэлэлцэх хурал 10 дугаар сарын НЭГ-нд болно

Орхон аймгийн ИТХ-ын Зөвлөлийн өнөөдрийн хуралдаанаар аймгийн 2026 оны хөгжлийн жилийн төлөвлөгөө, өрхийн эрүүл мэндийн төвүүдийн байршил, үйлчлэх хүрээ, журамд нэмэлт өөрчлөлт оруулах зэрэг асуудлуудыг хэлэлцэх бэлтгэл хангаж, илтгэл, илтгэгчийг баталлаа.

Өмнөх ээлжит 4 дүгээр хуралдаанд төлөвлөгөөг дахин боловсруулах шаардлагатай гэж үзэж хэлэлцэхээс татгалзсан тул, өнгөрсөн хугацаанд төлөөлөгч, хороод, намын бүлгээс саналууд аван дахин боловсруулжээ.

Тухайлбал, шинэчилсэн төлөвлөгөөнд:

• “Бүсийн оношилгоо эмчилгээний төв”-д бүх төрлийн донтолтыг эмчлэх нэгж бий болгох,

• Хүүхэд хүмүүжлийн эерэг арга зүй “Токкацү”-г сургуулийн өмнөх боловсролд шинээр нэвтрүүлэх,

• Хэрэгжүүлэх арга хэмжээний шалгуур үзүүлэлтийг хэмжигдэхүйц болгон өөрчлөх,

• Найруулгын шинжтэй засвар оруулж уялдаа холбоог сайжруулах,

• Нийт 185 арга хэмжээ тусгагдсан байна.

Зөвлөлийн гишүүдээс цөөн хүүхэдтэй анги, “Бонд”-той холбоотой ажил, намын бүлгийн саналуудыг тусгах, ажлын хэсгийн байр суурийг нэгтгэх зэрэг чиглэлээр саналуудыг өгч, хурлын бэлтгэлд тусгасан байна.

Эцэст нь аймгийн 2026 оны хөгжлийн жилийн төлөвлөгөөг аймгийн ИТХ-ын ээлжит бус 7 дугаар хуралдаанаар 10 дугаар сарын 1-нд хэлэлцэж, батлах юм.