Орхон аймгийн Иргэдийн Төлөөлөгчдийн Хурлын ээлжит дөрөвдүгээр хуралдаанаар ирэх 2026 онд тохиох Эрдэнэт хотын 50 жилийн ойг угтан, тус хотын бүтээн байгуулалт, хөгжилд онцгой хувь нэмэр оруулсан эрхмүүдийн нэрэмжит гудамжуудыг нэрлэж баталлаа.

Баян-Өндөр сумын Бүрэнбүст багийн 5-15 дугаар орон сууцны барилгын баруун хойд 4 замын уулзвараас Урт булаг багийн 5-19 дүгээр орон сууцны барилгын зүүн талын гурван замын уулзвар хүртэл 630 метр урт гудамжийг
Эрдэнэт хотын анхны даргаар ажиллаж байсан Самбуугийн Цэвээн-ий нэрэмжит гудамж болголоо.

Зэст багийн 1-1 дүгээр орон сууцны барилгын баруун урд гурван замын уулзвараас 1-6 дугаар орон сууцны барилгын зүүн хойд гурван замын уулзвар хүртэл 615 метр урт гудамжийг
“Эрдэнэт үйлдвэр” ТӨҮГ-ын Монгол талын (анхны) нэгдүгээр орлогчоор ажиллаж байсан Дондвоогийн Лхагвасүрэн-гийн нэрэмжит болголоо.

Зэст багийн 1-32 дугаар орон сууцны барилгын баруун талын гурван замын уулзвараас 1-13 дугаар орон сууцны барилгын зүүн хойд гурван замын уулзвар хүртэл 236 метр урт гудамжийг
Эрдэнэт үйлдвэрийн 1, 2 дугаар ээлжийн барилгын ажлыг удирдан гүйцэтгэсэн, “Медьмолибденстрой” барилгын удирдах газрын дарга Анатолий Васильевич Чекашов-ын нэрэмжит гудамж болголоо.

 Энэхүү шийдвэр нь Эрдэнэт хотын түүхэн бүтээн байгуулалт, хөгжлийн үйл хэрэгт үнэтэй хувь нэмэр оруулсан эрхмүүдийн гавьяаг хүндэтгэн, хойч үед таниулан мөнхжүүлэх зорилготой юм.