Улаанбаатар хотын төвөөр урсах Сэлбэ голыг сэргээх, үерээс хамгаалах зорилготой "Сэлбэ сэргэлт" төсөл анхнаасаа л сүржин амлалт, нүсэр төсөвтэй эхэлсэн. Гэвч өнөөдөр энэ төсөл иргэдийн талархлыг биш, харин халаглал, шүүмжлэлийг дагуулсан "бетон хашлага" болон хувирлаа.

Цаасан дээрх Диваажин

Төслийн урьдчилсан зураг төсөл дээр Сэлбэ гол иргэд сууж амрах чулуун шаттай, оргилуур бүхий усан толиотой, өвөл нь мөсөн гулгуур болдог, боржин чулуу болон металл хашлага хосолсон гоёмсог дизайнтай байв. Хотын удирдлагууд үүнийг 100 жилд нэг удаа тохиолдох үерээс хамгаалах бат бөх далан төдийгүй, иргэдийн амарч зугаалах 1.5 км үргэлжлэх ногоон байгууламж, "20 минутын хот"-ын жишиг хороолол болно гэж амласан юм.

Амлалт ба бодит байдал тэнгэр газар шиг зөрүүтэй байгааг дараах баримтууд гэрчилнэ. 

Голын дагуу 4.1-6.1 метр өндөр, зузаан бетонон түшиц хана барьсан нь голыг хотоос тусгаарлаж, иргэдийн гол руу харах, байгальтай ойр байх эрхийг хаав. Өөрөөр хэлбэл, нийт 400 тэрбум төгрөгийн төсөвтэй гэх төслөөр Сэлбэ голоо зөвхөн далан барих нэрийн дор 20.5 тэрбум төгрөгөөр цементэлжээ.

Уг төслийн зураг төслийг тухайн үеийн Хотын дарга Д.Сумъяабазар, Барилга, хот байгуулалтын сайд Ц.Даваасүрэн нарын шийдвэрээр боловсруулсан байдаг. Төслийн үндэслэл нь Ерөнхий сайдын 70 дугаар захирамж, Шадар сайдын А/23 дугаар тушаал зэрэг төрийн өндөр түвшний шийдвэрүүдээр баталгаажсан. Түүнчлэн, мэргэжлийн бус буюу жүжигчин Б.Цэцэгийг төслийн удирдагчаар томилсон нь анхнаасаа л энэ ажил мэргэжлийн түвшинд бус, шоу хэлбэрээр явахын дохио байжээ.

Цаасан дээрх тогтоолууд бодит байдал дээр иргэдийн амьдрах орчныг дордуулсан цементэн хэрэм болон бослоо. Сэлбэ голыг сэргээх нэрээр татвар төлөгчдийн мөнгийг үр ашиггүй зарцуулж, байгалийн голыг бетонон хайрцагт хорьсон энэ үйлдлийг хэн хариуцах вэ? Сэлбэ гол сэргэсэн үү, эсвэл ...