Аймгийн Засаг дарга Б.Зоригтбаяр “Эрдмин”, “Ачит Ихт”, “Зэс Эрдэнийн хувь” ХХК-тай 2025 онд хамтран ажиллах гэрээнд гарын үсэг зурж, төлөвлөгөө батлах үйл ажиллагаа А.Амарын танхимд боллоо. 
         Орон нутагт үйл ажиллагаа явуулж буй уул уурхайн компаниудтай хамтран ажиллах жилийн төлөвлөгөөнд орон нутгийн хөгжлийг дэмжих, ажлын байр нэмэгдүүлэх, боловсрол эрүүл мэндийн салбарт бүтээн байгуулалт хийх, иргэдийн амьжиргааг дээшлүүлэх зорилт бүхий ажлууд төлөвлөгддөг. 
         Энэ онд Байгаль орчин экологи, боловсрол эрүүл мэнд, нийгмийн хамгаалал болон бусад чиглэлээр "Эрдмин" ХХК нийт 105 сая төгрөгийн хөрөнгө оруулалтаар  12 арга хэмжээ, "Ачит Ихт" ХХК 155 сая төгрөгийн хөрөнгө оруулалтаар 10 арга хэмжээ, "Зэс Эрдэнийн хувь" ХХК 150 сая төгрөгийн хөрөнгө оруулалтаар 10 арга хэмжээг тус тус хэрэгжүүлэхээр төлөвлөж гэрээнд тусгажээ. 
         Тодруулбал: “Эрдмин” ХХК  нь БОЭТ-ийн бүх тасаг нэгжүүдийг  өвчтөн зөөвөрлөх ороор хангах, Орхон аймгийн шилдэг тамирчдыг тив дэлхий олон улсын тэмцээнд өөрийн нэрээр оролцуулж цалин хөлс олгох зэрэг 12 ажил төлөвлөжээ. 
         Мөн “Ачит Ихт” ХХК-ийн төлөвлөгөөнд ЕБ-ын VIII  сургуулийн химийн кабинетыг засаж, тохижуулах, орон нутагт химийн олимпиад зохион байгуулах, урлаг спортын болон бусад арга хэмжээнд дэмжлэг үзүүлэх зэрэг ажлууд тусгагдажээ. 
         Орон нутагтай хоёр дахь жилдээ хамтран ажиллах гэрээ байгуулж буй  “Зэс Эрдэнийн хувь” ХХК нь 2025 онд  ЕБ-ын IV сургуулийн физикийн кабинетийг тохижуулах, Засгийн газраас зарласан тэргүүлэх чиглэлээр их дээд сургуульд суралцаж буй оюутанд тэтгэлэг олгох ажээ. 
        Түүнчлэн уул уурхайн компаниудын хувьд орон нутагтай хамтран аялал жуулчлалаа хөгжүүлэх, сурталчлах зорилгоор “Зэс фестиваль” үйл ажиллагааг жил бүр зохион байгуулах, Тэрбум мод үндэсний хөдөлгөөн, “Ногоон Эрдэнэт” хөтөлбөрийн хэрэгжилтийг хангах хүрээнд хамтран ажиллаж байна.