Даваа гарагийн Засаг даргын шуурхай зөвлөгөөн боллоо. Шинэ жилийн баярын өдрүүдэд  өндөржүүлсэн бэлэн байдлын зэрэгт ажилласан  Цагдаа, Онцгой байдлын газраас нөхцөл байдлын талаар  мэдээллээ. Орхон аймаг, Эрдэнэт хотын хэмжээнд  шинэ жилийн баяр, амралтын өдрүүдэд гамшиг аюулт үзэгдэл, гал түймрийн дуудлага, ослын дуудлагагүй тайван өнгөрсөн болохыг Онцгой байдлын газраас илтгэлээ. 

Харин цагдаагийн байгууллагад  бүртгэгдсэн гэмт хэрэг зөрчлөөс хүний эрүүл мэндийн халдашгүй байдлын эсрэг гэмт хэрэг өнгөрсөн оны мөн үеэс 66,7 хувиар өссөн үзүүлэлттэй байна гэж мэдээлэв.  Онцгой байдлын газрын нийт бие бүрэлдэхүүн  арванхоёрдугаар сарын 31-ний өдрийн 09:00 цагаас нэгдүгээр сарын 02-ны өдрийн 09:00 цаг хүртэлх хугацаанд албаны бэлтгэл, бэлэн байдлыг ханган ажиллажээ. 

 “Амарын талбай”-д зохион байгуулсан шинэ оноо угтах  соёл, урлагийн үйл ажиллагаанд Онцгой байдлын газраас гал унтраах тусгай зориулалт бүхий үндсэн албаны нэг автомашин, 14 алба хаагч аюулгүй байдлыг хангуулан, хяналт тавьж ажилласан  байна. 

Мөн цахилгаан эрчим хүчний хэт ачааллаас гарах гал түймрийн аюулаас урьдчилан сэргийлэх, Пиротехникийн хэрэгслийг баталгаагүй, зөвшөөрөлгүй газраас худалдан авах нь эрүүл мэнд, өмч хөрөнгөд эрсдэл учруулах аюултай болон Зөрчлийн тухай хуулийн дагуу арга хэмжээ тооцдог талаарх зөвлөмж, мэдээллийг олон нийтэд өгсөн гэж мэдээллээ.  Цагдаа болон дотоодын цэргийн 112 алба хаагч нэг бүрийн тусгай хэрэгсэлтэй, 8 тээврийн хэрэгсэлтэйгээр нийтийн хэв журам хамгаалах, олон нийтийн аюулгүй байдлыг хангах, гэмт хэрэг, зөрчлөөс урьдчилан сэргийлэх чиглэлээр шинэ жилийн баярын өдрүүд болон амралын өдрүүдэд  үүрэг гүйцэтгэжээ. 

Арванхоёрдугаар сарын 30-аас нэгдүгээр сарын 01-ны өдрүүдэд иргэн, хуулийн этгээдээс 106 дуудлага, мэдээлэл хүлээн авч шалгасан нь өмнөх жилийн мөн үеэс 7 дуудлага, мэдээллээр буюу 7.1 хувиар өссөн үзүүлэлттэй байна.

Нийт дуудлага мэдээлийн 22 нь замын хөдөлгөөний аюулгүй байдлын журам зөрчсөн, 45 нь гэр орон сууцандаа хэрүүл марган хийж амгалан тайван байдал алдагдуулсан, 15 нь гудамж талбайд согтуу хүн хэвтэж байгаа тухай дуудлага бүртгэгдсэн нь нийт дуудлагын 82 буюу 77 хувийг эзэлсэн байна. 

Согтууруулах ундааны зүйл хэрэглэсэн үедээ тээврийн хэрэгсэл жолоодон замын хөдөлгөөнд оролцсон 4 зөрчил илрүүлсэн нь  өмнөх оны мөн үеэс гурван  зөрчлөөр буюу 42.9 хувиар буурчээ.  Баяр, амралтын өдрүүдэд ажилласан хөдөлгөөнт болон явган эргүүлийн алба хаагч нар архи согтууруулах ундааны зүйл хэрэглэсэн үедээ зөрчил гаргасан, гудамж талбайд биеэ авч явах чадваргүй болсон 19 иргэнийг ар гэрт нь хүлээлгэн өгч ажилласан гэж мэдээллээ. 

Мэдээллийн төв