Хүүхдийн эрхийн зөрчилд хүчирхийлэгчийг буруутгаж шуугисаар мартдаг энэ жишгийн цаана хүүхдийн эрхийг зөрчих нөхцлийг бүрдүүлээд тавьчихсан хүмүүс өөрсдийгөө өрөвдөөд, өрөвдүүлээд дуусдаг муухай зуршил бат тогтжээ. 2021 онд хүчирхийлэлд өртсөн хүүхдийн 44 хувь нь сургууль дээрээ болон сургуулийн орчинд, 5 хувь нь гудамжинд буюу нийгмийн харилцаанд орох явцдаа, 51 хувь нь гэр бүлийн орчиндоо эрхээ зөрчүүлж, эрүүл мэнд, сэтгэл санаагаараа хохирсон байна. Орхон аймгийн тухайд л гэхэд хүүхдийн эсрэг бэлгийн хүчирхийлэл 90 гаруй хувь нь гэр бүлийн орчинд үйлдэгдэж, бас л 90 гаруй хувь нь ураг төрлийн хамааралтай хүмүүс хүүхдийн амьдралд арилшгүй хар толбо үлдээсэн байгаа. 2022 оны 108 утасны дуудлагын мэдээг харахад ч гэсэн 80-аас илүү хувь нь гэр бүлийн орчин дахь хүүхдийн хүчирхийллийн мэдээлэл байх жишээний. Өнөөдөр гишүүд маань шүгэл үлээлээ. Харин хүүхдүүд маань гэртээ шүгэлдэх үү? Хүүхдийн эрхийн зөрчилийг гаргаад өөгшүүлээд байгаа эх сурвалж нь төр өөрөө байгаа тохиолдол, жишээг хүргэе. СУРГУУЛЬ, ЦЭЦЭРЛЭГИЙН ОРЧИНД АРХИНЫ ТУСГАЙ ЗӨВШӨӨРӨЛТЭЙ 50 ОРЧИМ ААН ҮЙЛ АЖИЛЛАГАА ЯВУУЛЖ БАЙНА     Тодруулбал, хүүхдиийн эрх, сургуулийн орчны стандарт архины тусгай зөвшөөрөл олголттой холбоотойгоор хангагдаж чаддаггүй. Энэ зөвшөөрлийг орон нутагт аймгийн Засаг даргын захирамжаар олгодог. Өнөөдрийн байдлаар Орхон аймагт нийт 416 архины тусгай зөвшөөрөлтэй ААН үйл ажиллагаа явуулж байгаагийн 50 орчим нь сургууль, цэцэрлэгийн орчинд, хүүхдийн эрх, ЕБС-ийн стандартыг зөрчөөд олгогдсон гэсэн үг. Нэрлэн тоочвол,  ЕБС-ийн 4, 1, 14, 17, Орос сургууль, Билэгт өргөө, Орхон импати, Гэгээн билэг, 16-р цэцэрлэгийг боловсролын газраас нэрлэж байна. Энэ нь сургуулийн гадаад орчинд суралцагчийн суралцах, хөгжих, хамгаалагдах нөхцөлийг бүрдүүлэх боловсролын үйлчилгээний орчны стандартыг зөрчиж байгаа хэлбэр. Тамхитай тэмцсэн шиг ээ, согтууруулах ундаа худалдах, түүгээр үйлчлэх зөвшөөрлийг  үзэгний хошуугаараа шийдвэрлэхдээ манайхан хүүхдээ мартсан уу? “Архины тусгай зөвшөөрөлдөө анхаарч, хүүхдийн эрхээ хамгаалагдсан ЕБС-ийн стандартаа барина уу” дарга нар аа! Энэ тусгай зөвшөөрлийн цаана бага, дунд, өсвөр насны сурагчдад дам бусаар сургуулийн орчинд нь сөрөг нөлөө үзүүлж буйг та бүхэн бодож үзсэн үү? Түүгээр ч зогсохгүй боловсролын салбарт хийгдсэн хөрөнгө оруулалт үнэгүйдсээр байх уу? Биеийн тамирын талбай, гадна тохижилтыг ажлыг сүйтгэж, бохирдуулах, цаашлаад хүүхэд гэмт хэрэг, хүчирхийлэлд өртөж, золиослогдох эрсдэлд төр өөрөө ойртуулж буй. Таны, миний, бидний үр хүүхэд, ирээдүй хойчын эрх зөрчигдсөөр, төсөөлшгүй эрсдэл “АРХИНЫ ТУСГАЙ ЗӨВШӨӨРӨЛ”-ийн дэргэд ойрхон байна.