Эрдэнэтэд шинээр ашиглалтад орсон “Гранд Гарден” хотхоны ашиглалтын албанаас дундын өмчлөлийн эд хөрөнгө хамгаалалт, ашиглалт, үйлчилгээндээ Эрдэнэт хот дахь хамгийн өндөр төлбөрөөр гэрээ байгуулж, сар бүр төлж барагдуулахыг оршин суугчиддаа тулгасан талаар иргэнээс гомдол мэдээлэл ирлээ. Энэ талаар бид холбогдох хяналтын байгууллагад уламжлан хүргэхээр дараах мэдээллийг бэлтгэлээ.    СӨХ-г орон сууцны байшин тус бүрт, эсхүл хотхон дунд нийт оршин суугчдын санаачилгаар, эсхүл харьяа сум, дүүргийн Засаг даргын санаачилгаар хуралдуулж, байгуулах бөгөөд хурлаар СӨХ-ны нэр, үйл ажиллагааны дүрэм, орон сууцны ашиглалт, хамгаалалт, засвар, үйлчилгээтэй холбогдох зардлыг санхүүжүүлэхэд оршин суугч тус бүрээс оролцох журам, тарифыг батлах, мөн холбооны удирдах зөвлөл, хяналтын зөвлөлийн гишүүд, гүйцэтгэх захирлыг томилох шийдвэрийг гаргана гэж холбогдохоор журамласан байдаг.     Гэтэл “Гранд Гарден” хотхоны ашиглалтын албаараа СӨХ-ны үйл ажиллагааг хариуцаж байгаа бөгөөд оршин суугчидтай СӨХ-ны үйл ажиллагааг зохион байгуулах хурлыг сууц өмчлөгчдийн санаачилгаар шийдвэрлээгүй. Төлбөр тооцооны үнэ тарифыг өөрсдөө дур мэдэн баталж, гэрээнд тусган гарын үсэг зурахыг оршин суугчдаасаа шаарджээ. Харин уг гэрээг хүлээн зөвшөөрөөгүй татгалзаж, төлбөрийг барагдуулахгүй, хэт өндөр дүнтэй СӨХ-ийн мөнгийг төлөхгүй гэсэн айл өрхийн  эрчим хүчний хэрэглээг хязгаарлаж, өр төлбөрөө барагдуулж, тооцоогоо хийсний дараа залгуулаарай хэмээн мэдэгджээ. Гэрээнд СӨХ-ны дундын өмчлөл, цэвэрлэгээ үйлчилгээний сарын хураамжийг доорх үнийн дүнгээр тусгасан байгаа юм. Үүнд: 56мкв 2 өрөө байр 56000 төгрөг 75мкв 3 өрөө байр 62500 төгрөг 134мкв 4 өрөө байр 82500 төгрөгийг сар бүр заасан дансанд байршуулахаар заажээ.    Харин оршин суугчдын зүгээс дээрх хураамж төлбөрийг  хүлээн зөвшөөрөхгүй. “Шинээр ашиглалтад орсон байр гэхэд хэт өндөр үнэтэй байна”. Мөн бидэнтэй зөвлөлгүй шууд тулган шаардаж байгаа нь зүй бус. Хүлээн зөвшөөрөөгүйн төлөө өнөөдөр эрчим хүчээ хязгаарлуулж 2,3 хонож байна. Үүнээс шалтгаалж айл өрхийн цахилгаан хэрэгсэл шатаж гэмтэх, доторх идэш ууш муудаж үнэгүйтэх, гэнэтийн асуудал үүсэхэд хэн хариуцах  талаар тодруулж өгөхийг хүссэн. Мөн мэргэжлийн байгууллагад хандаж, гомдол гаргана гэсэн юм.      Мэдээллийг тэнцвэртэй хүргэх үүднээс бид “Гранд Гарден” хотхоны “Ашиглалтын алба-ны 90904900 дугаарт холбогдож СӨХ хариуцсан албаны хүнтэй нь холбогдсон.  Тэрээр хэлэхдээ, манайх нийт 144 өрхтэй. Цэвэрлэгээ үйлчилгээ хариуцсан ажилтандаа сард 1 200 000-1 400 000 төгрөгний цалин олгодог. Бид  айл өрхүүдтэйгээ гэрээ байгуулахдаа анхнаасаа гэрээндээ тусгаад өгсөн. Ямар ч хууль зөрчсөн асуудал байхгүй гэв.  Харин ямар үндэслэлээр үнээ тогтоосон, айл өрхийн цахилгааныг хязгаарлах эрх нь өөрсдөд нь бий талаар лавлахад, би чамд хариулах албагүй. Эрдэнэтэд ямар сэтгүүл зүй байдаг юм. Хуцаарай чи муу? Ирээд уулзаарай! Муу С.Батжаргалын суганы үснүүд... гэх мэтээр хараасаар утсаа тасаллаа. \/ Бид албан байгууллага, холбогдож байгаа хүн нь хэн болохоо мэдэгдээд, иргэнээс ирсэн гомдлын талаар холбогдож буйгаа тодорхой мэдэгдсэн болно\/   Төд удалгүй бидэнтэй тус хотхоны бас нэгэн оршин суугч холбогдов. Нэрийг нууцлав. Тус оршин суугч хэлэхдээ, сая манай байрны ашиглалтын албаны Б.Уранбилгүүн гэж хүн надтай холбогдсон юм аа. Энэ байранд тогоо таслуулсан 5-6 айл бий. Гэтэл чи муу л хэвлэлээр яваа биз. Гэр хорооллоос ирсэн чам шиг юм манай хотхонд үнийг нь дийлээд амьдарч чадахгүй л дээ гээд зандарч, орилоод байх юм. Бид хуулийн дагуу тохирох мөнгөө төлөөд орон сууц худалдан авч,нүүж орсон. Гэтэл яагаад өөрийнхөө гэрээс хөөж байгаа юм шиг биднийг доромжилж, сүрдүүлж байгааг ойлгохгүй байна. Мэдээлэлдээ тусгаж өгнө үү гэсэн юм. Оршин суугчийг сүрдүүлж, доромжилсон бичвэрийг баримтаар хавсаргав. Бид энэ асуудлаар бид Орхон аймаг дахь СӨХ-ны дарга Г.Ганхуягтай утсаар холбогдож лавлахад: “Гранд Гарден” хотхон СӨХ байгуулж баталгаажуулаагүй. Бидэнд мөн гомдол ирсэн. Танай байранд 4 ба түүнээс дээш айл оршин суудаг бөгөөд сар бүр цэвэрлэгээ, үйлчилгээ зэрэг наад захын хураамж авдаг бол СӨХ үйл ажиллагаагаа явуулж байна гэсэн үг. Гэхдээ иргэд өөрсдөө хуралдаж байж үнээ тогтоох ёстой. Эдний үнэ Эрдэнэтэд авч байгаа хамгийн өндөр үнээр тогтоосон байсан. Өнөөдөр жишээ нь:  “Уурхайчин” хорооллын СӨХ гэхэд 2 өрөө байрнаас 25000 төгрөгөөр СӨХ-ны сарын хураамжаа тогтоож, татан төвлөрүүлж байна “ гэсэн юм. Мөн бид Хотын захирагчийн албаны даргыг түр орлон гүйцэтгэгч С.Ганцогттой холбогдож тодруулахад,” Би энэ талаар мэдээлэлгүй байна. Холбогдох албаныхнаас асуудлыг тодруулж, тус хотхоны ашиглалтын албаныхантай уулзана. Үнэхээр иргэдийн эрх ашгийг хөндсөн эсэхэд үнэлгээ хийгээд эргэж холбогдъё” гэлээ. Уриалгахнаар реклам сурталчилгаа явуулж, оршин суугчдаа татаж байсан "Гранд Гарден" хотхоны ашиглалтын албаныханд оршин суугчдаа дарамтлах эрх бий юу? Уг асуудалд холбогдох албаныхан, Шударга өрсөлдөөн хэрэглэгчдийн төлөө газар, МХГ, Хотын захирагчийн алба болон бусад холбогдох газрууд анхаарлаа хандуулахыг оршин суугчид хүсэж байна Нүүр зургийг "Гранд Гарден" хотхоны борлуулалтын зарын хуудаснаас ашиглав.