Монгол орны гадаргын усны нөөцийн 74.6 хувь, манай улсын бүх нууруудын усны нөөцийн 63.4 хувийг дангаараа эзэлдэг. Хөвсгөл нуур нь дэлхийн хамгийн гүн цэнгэг устай, нэн эртний нууруудын нэг юм.  Хөвсгөл нуур нь дэлхийн арван долоон эртний нуурын нэг, 2 сая гаруй жилийн настай хэмээн тооцоолсон байдаг. Хөвсгөл нуур нь мөнх цэвдгээр хүрээлэгдсэн дэлхийн цорын ганц нуур юм. Мөн өвөрмөц тогтоц, байгалийн үзэсгэлэн, биологийн ховор  төрөл зүйл, унаган төрхөөр нь хадгалж ирсэн уламжлал хийгээд соёл,  үндэстэн  ястны өлгий нутаг билээ. Гэвч Монгол Улсын аялал жуулчлалын томоохон чиглэл болсон Хөвсгөл нуурын бохирдлыг үүсгэж байгаа хүчин зүйл нь нуурыг түшиглэсэн дотоодын болон гадаадын аялал жуулчлал юм. Иймээс Хөвсгөл нуур орчмын бохирдол болон эко системийг хамгаалах, сөрөг нөлөөллийг бууруулах, мөн аялал жуулчлалыг шинэ шатанд гаргах өөрчлөлт хийхээр “Хөвсгөл нуураа хамгаалах үндэсний чуулган”-ыг Монгол Улсын Ерөнхийлөгчийн санаачилгаар  зохион байгуулж байна.  Хөвсгөл нуурын эко системийг хамгаалах, Хөвсгөл нуурыг тогтвортой аялал жуулчлалын бүс болгон хөгжүүлэх, Хөвсгөл нуурын усны бохирдол, чанарын асуудал болон Хөвсгөл нуурт живсэн машин, техникийг татан гаргах ажиллагаа гэсэн үндсэн салбар хуралдаануудаар чуулган үргэлжилж, цаашид авч хэрэгжүүлэх үйл ажиллагааны шийдвэрт хүрэх юм.  Тус чуулганыг зохион байгуулснаар Хөвсгөл нуур орчмын аялал жуулчлалын баазуудын байршлыг хатуу төлөвлөх, ариун цэврийн байгууламж, хог хаягдлын хяналтыг сайжруулах,  цэвэр бохир ус, замын дэд бүтцийг системтэй төлөвлөж, улмаар  Хөвсгөл нуур орчмын аялал жуулчлалыг шинэ шатанд гаргаж, унаган байгаль, цэнгэг усаа ирээдүй, үр хойчдоо өвлүүлэн үлдээх боломж бүрдэнэ гэж үзэж байгаа юм.