JCI буюу “Junior Chamber International” нь АНУ-ын Миссүри мужийн Сэйнт Луис хотод 1915 онд байгуулагдсан бөгөөд 100 гаран жилийн түүхэн замналдаа НҮБ-ийн Ерөнхий нарийн бичгийн дарга, АНУ-ын дөрвөн Ерөнхийлөгч, Японы Улсын Долоон Ерөнхий сайд, Жак Ширак, Билл Гейтс, Алберт Гор зэрэг дэлхийн олон алдартнуудыг эгнээнэдээ нэгтгэсэн Олон Улсын төрийн бус байгууллага юм. Идэвхтэй залуу иргэдийн дэлхийд тэргүүлэх байгууллага байх гэсэн алсын хараатай тус байгууллага нь өдгөө 120 гаруй улсад 5000 гаруй салбартай бөгөөд 18-40 насны 200,000 гаруй идэвхтэй гишүүд, нэг сая гаруй дэмжигчидтэйгээр залуу удирдагчид, ажил хэрэгч хүмүүс хамтран сайн дурын үндсэн дээр үйл ажиллагаагаа явуулж байна. JCI байгууллага нь НҮБ-д зөвлөх эрхтэй цорын ганц олон улсын залуучуудын байгууллага бөгөөд ЮНИСЕФ, ЮНЕСКО–ын үйл ажиллагаанд тогтмол идэвхтэй оролцож байдаг нь энэ байгууллагын бас нэгэн онцлог юм. Харин манай улсад “JCI Монгол байгууллага” 1992 онд үүсгэн байгуулагдаж, 1995 онд Шотландын Гласгов хотод зохион байгуулагдсан JCI байгууллагын 50 дахь Чуулганаар JCI байгууллагын гишүүн Үндэсний байгууллагаар батламжлагдсан түүхтэй. Одоо 15 салбар, хоёр ажиглагч салбар байгууллагатай болон өргөжиж, 2022 оны байдлаар 1232 гишүүн, 400 гаруй сенатор, 1000 гаруй дэмжигч, хамтран ажиллагч нартай үйл ажиллагаагаа явуулж байна. JCI байгууллага өөрийн даган мөрдөх зарчмын дагуу үйл ажиллагаа явуулж: - Хувь хүний хөгжил - Нийгмийн хөгжил - Олон Улсын хамтын ажиллагаа - Бизнес хамтын ажиллагаа зэрэг 4 боломжийг гишүүддээ олгодог. Залуу манлайлагчдад эерэг өөрчлөлт бүтээх хөгжлийн боломжийг олгох нь JCI байгууллагын эрхэм зорилго аж. Ийнхүү Монголын идэвхтэй залуусыг эерэгээр өөрчлөн хөгжүүлж, нийгэмд тодорхой хувь нэмэр оруулсан үйлсээрээ ТОД гэрэлтсээр байгаа JCI Монгол байгууллага энэ онд 30 жилийн түүхэн, тэмдэглэлт ойтойгоо золгож байгаа бөгөөд Орхон аймаг дахь салбар байгууллага болох JCI Эрдэнэт салбар өдгөө 25 дахь жилдээ үйл ажиллагаагаа явуулж, Эрдэнэт хотын идэвхитэй залуу иргэдээр хүрээгээ тэлсээр байна. Гишүүдийнхээ татвар, дэмжигч нарынхаа хандиваар санхүүждэг JCI Монгол байгууллагын салбар байгууллагууд өнгөрсөн хугацаанд нийгэмд болон дотооддоо чиглэсэн 300 орчим төсөл, тогтвортой хөгжлийн зорилтын 200 орчим төсөл хөтөлбөрийг хэрэгжүүлсэн байна. Тухайлбал ЦЕГ-тай хамтарсан “Нэг хором” төсөл, нярай хүүхдийн эндэгдлийг бууруулахад чиглэсэн “Save angles” төсөл, Цус Сэлбэх Судлалын Үндэсний төвтэй хамтран хэрэгжүүлдэг “Амьдрал бэлэглэе” гэх мэт төслүүдийг иргэд илүүтэй мэддэг болсон. JCI Эрдэнэт салбар байгууллага ч мөн адил 2022 онд анхны тусламжийн анхан шатны мэдлэг олгох зорилготой "Бид Аврагчид", нийтэд JCI байгууллагын үзэл санааг сурталчилан таниулах зорилготой "Why JCI", гишүүдийн бизнесийн боломжийг дэмжих "Cooperate" төслүүдийг хэрэгжүүлж эхлээд байна. Үүнээс онцлоход Орхон аймгийн Эрүүл мэндийн Газар, Орхон аймгийн Улаанзагалмайн хороо, JCI Эрдэнэт салбар байгууллага хамтран 2022 оны Амилуулах тусламж үйлчилгээний мэдлэг ойлголтыг хүн бүрт хүргэх зорилгоор “Бид аврагчид” төслийн хүрээнд цуврал сургалт зохион байгуулж байна. Энэхүү төслийг 2022 оны 02 дугаар сарын 05-нд дээрх байгууллагууд хамтын ажиллагааны санамж бичиг зурж, “Амилуулах тусламж үйлчилгээ”-ний сургалтыг зохион байгуулж эхлүүлсэн бол 2022 оны 02 дугаар сарын 18-ны өдөр тус төслийн 2 дахь сургалтаа “Монгол Шуудан” ХК-ийн Орхон аймгийн Шуудангийн үйлчилгээний газар, “Мэдээлэл Холбооны Сүлжээ” ТӨХК-ийн Орхон аймгийн газрын ажилтнууд болон Их залуу баг, Яргуйт багийн ажлын албаны хамт олонд зориулан зохион байгууллаа. Ийнхүү “JCI Монгол” гэсэн нэгэн дээвэр дор нэгдсэн идэвхтэй, залуу, манлайлагч иргэд хамтдаа “Хүний төлөө сайн сайхан зүйлийг хийж бүтээх нь амьдралын хамгийн эрхэм үйлс” хэмээн өөрт шууд хамааралтай бус ч нийгэмд тулгараад буй сорилт, асуудлуудыг шийдэх гарц шийдэл хайж, түүний төлөө өөрсдийн оюун, санхүү, цаг заваа зарцуулсаар байна.