Дарханд "Ковид-19"-ийн халдварын батлагдсан тохиолдол долоо боллоо
Дархан-Уул аймгийн Онцгой комиссын 18 дугаар хуралдаан өнөөдөр \/2021.03.23\/ болж цаг үеийн нөхцөл байдалтай холбоотой мэдээлэл өглөө.
Өвөрхангай аймгийн “Сэмжид-Хужирт” сувилалд амраад ирсэн 17 хүний 1 нь хүүхэд байна. 16 хүнд КОВИД-19-ийн PCR шинжилгээ хийхэд 7 хүнээс халдвар илэрч 9 хүний хариу сөрөг гарсан байна.
Сүүлийн 2 батлагдсан тохиолдол буюу 6,7-р тохиолдлын ойрын хавьтал 139 хүнийг тандалт судалгаагаар тогтоогоод байна. 5 иргэнийг Нэгдсэн эмнэлгийн Халдвартын тасагт тусгаарлан эмчилж байна. Бага насны нэг хүүхдийг ээжийнх нь хүсэлтээр эмнэлэгт хамтад нь хэвтүүлсэн. Эмчлүүлж буй хүмүүсийн биеийн байдал дунд зэрэг байна. Сүүлийн 2 тохиолдлыг Шарын гол сумаас тээвэрлэн авчирч байна.
Батлагдсан тохиолдлуудын 5 нь энэ сарын 21-22-нд шилжих шөнө, 2 нь 3 дугаар сарын 12-нд Дарханд иржээ. Эхний 5 тохиолдлын ойрын хавьтлын 11 хүнийг ажиглан тусгаарлах байранд тусгаарлаад байна. Мөн Хотод очиж илэрсэн хүний ойрын хавьтлын 9 хүн тусгаарлах байранд байна.
3-р сарын 12-нд ирсэн иргэдийн ойрын хавьтлуудаас Дарханд 22 нь байна. Эдгээр иргэдээс нарийвчилсан шинжилгээг авах ажлыг эхлүүлсэн. Өнөөдөртөө багтан хариу нь гарна.
Өнөөдрийн байдлаар Дарханд бүх үйл ажиллагаа хэвийн байгаа бөгөөд 22 иргэний хариуг харж байж цаашид авах арга хэмжээ тодорхой болох юм. Аймгийн Онцгой комиссын зүгээс аль болох халдварын тархалтыг тогтоож ААНБ, иргэдийн үйл ажиллагааг хэвийн үргэлжлүүлэх бодлого чиглэл баримтлан ажиллаж байна. Энэ сарын 12-нд ирсэн 2 иргэний ойрын хавьтлын 108 иргэн Шарын голд байна. Эдгээр иргэдийг гэрт нь гэр бүлийн гишүүдтэй хамт тусгаарлаж нарийвчилсан шинжилгээ авах ажлыг өнөөдрөөс эхлүүлж байна.
Халдвартай иргэдээс Наурызын баяраар гэртээ зочин урьсан, айлд зочилсон өгүүлэмжтэй хүмүүс байна. Харин Сэлэнгэ аймагт ойрын хавьтлын 9 хүн байна.
Өнөөдрийн байдлаар аймгийн хэмжээнд СӨБ-д хамрагдалт 69 хувь, ЕБС-д хамрагдалт 80 хувьтай байна.
Аймгийн Онцгой комисс орой 17:00 цагт хэсэгчилсэн байдлаар ахин хуралдах юм.
Эх сурвалж: Дархан-Уул аймгийн ОК
0
0
0
0
0
0
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ETimes.mn хариуцлага хүлээхгүй.