Орхон аймгийн иргэдийн хаврын хүнсний хэрэглээнд зориулж Эрдмийт ХХК нийт 300 тн махыг энэ сарын 15-ны өдрөөс эхлэн 8 цэгээр дамжуулан худалдаанд гаргасан. Ангилан савласан нөөцийн махны үнийг танилцуулбал 1 кг үхрийн мах 8400, хонины мах 7500, ямааны мах 6500 төгрөгний ханштай борлуулагдаж эхэлсэн байна. Гэвч алслагдсан багуудад нөөцийн махны хүрэлцээ хангамжийг нэмэх шаардлага бий гэдгийг өнөөдрийн шуурхай хуралдааны үеэр аймгийн Засаг дарга Д.Батлут онцлон хэлсэн. Гэвч мах худалдан борлуулах стандарт шаардлага хангах дэлгүүр байгаа нь л энэ гэх хариултыг МХГ, ХХААГ-аас өгч байх юм.Аймгийн хэлтэс агентлагууд хэдий хүртэл дотоод дүрэм журмынхаа дагуу зохион байгуулаад болчих ажлыг Засаг даргаараа заалгаж суух вэ. Та бүхний сэтгэлгүй, залхуурлын цаана иргэдийн амьжиргаа, санхүүтэй холбоотой олон асуудал бий гэдгийг санаж Шанд, Даваат, Их залуу, Яргуйт багт машин унаа явахгүй байгаа байршилд нөөцийн мах худалдан борлуулах цэгүүд нээх хэрэгтэйг мэдээллийн олон урсгалаар иргэд хэлээд байна. Аргаа барсан засаг ноён Нөөцийн мах худалдаалах дэлгүүр олдохгүй бол та нар ажлаа муу хийж байгаа юм биш үү гэж албаныханд хандаж байхав. Өнөөдрийн байдлаар говил багт “Говийн бумба” ХХК-ийн хүнсний дэлгүүр, Баянцагаан багт “Эрдэнэт өег” ХХК-ийн хүнсний дэлгүүр, Оюут багт 2-28-р байрны “Эрдмийт” ХХК-ийн нэрийн барааны дэлгүүр, Уурхайчин багт “Энх” худалдааны төвд байрлах нэрийн барааны лангуу, Хүлэг хүнсний захад байрлах нэрийн барааны дэлгүүр, Наран багийн хорооллын эцэст нэрийн барааны дэлгүүр, Цагаанчулуут багт “Хийморь” худалдааны төвийн нэрийн барааны лангуу, Жаргалант сумын "Боржигон” хүнсний дэлгүүр гэсэн 8 цэгээр нөөцийн мах худалдаалагдаж байна. Цаашид цэгүүдийн байршил, тоо нэмэгдэж, иргэд ч баталгаатай үйлдвэрийн аргаар бэлтгэсэн хямд махаа худалдан авах боломж нь бүрдээсэй билээ.