Монгол Улсын Ерөнхийлөгч Х.Баттулга 2020 оныг угтан нийт ард түмэндээ хандан үг хэлэхдээ ҮАБЗ-ийн  гишүүд тэтгэврийн зээлийг нэг удаа тэглэх асуудал дээр санал нэгдэн шийдвэр гаргасан гэж мэдэгдсэн. Тэгвэл өнөөдрийн байдлаар ҮАБЗ-ийн гишүүн Ерөнхий сайд, УИХ-ын даргын  хэн хэн нь албан ёсны мэдэгдэл хийгээгүй байна. ХНХ-ын  сайд С.Чинзоригийн мэдэгдэж буйгаар уг асуудалтай холбоотойгоор Ерөнхий сайд У.Хүрэлсүх өнөө маргаашгүй захирамж гаргах аж. Тэтгэврийн зээлийг тэглэх мөнгөний эх үүсвэрээ Салхитын ордыг эдийн засгийн эргэлтэд оруулах замаар шийдвэрлэнэ гэж Ерөнхийлөгч мэдэгдсэн. Тодруулбал, Салхитын ордыг барьцаалж бонд босгож мөнгө олох тухай яригдаж буй аж. Энэ оноос эхлээд 2024 он хүртэлх хугацаанд 14.4 тэрбум ам.долларын өр төлбөр төлөхдөө, өрийг өрөөр санхүүжүүлэх гарцтай байгаа манай улсын тухайд дахиад нэг БОНД-ын асуудал ямар ч байсан яригдаж эхэллээ.  Төв банкны ерөнхийлөгч тэтгэврийн зээл нэмж олгохгүй байх үүргийг арилжааны банкуудад өгөөд байна.  Тэтгэврийн зээлийг тэглэх асуудал ийнхүү яригдаж эхэлсэнтэй холбоотойгоор өчигдөр буюу 2020 оны нэгдүгээр сарын 1-нээс хэрэгжиж эхлэх хүлээлттэй байсан тэтгэврийн зээлийн хүүг бууруулах асуудал зогсжээ. НХХЯ-наас Тэтгэврийн зээлийн хүүг бууруулах гэрээг цуцлах асуудлыг банкууд руу хүргүүлсэн аж. Сануулахад, Ахмадуудын тэтгэврийн зээлийн дарамтыг бууруулах ажлын хүрээнд зургаан сарын хугацаатай тэтгэвэр барьцаалсан зээлийн хүү 15 хувь байсныг зээлийн хугацааг нэг жил, хүүг 12 хувь болгон 2018 оны нэгдүгээр сараас хэрэгжүүлсэн.    2019  оны нэгдүгээр сарын 16-наас эхлэн нэг жилийн хугацаатай тэтгэвэр барьцаалсан зээлийн хүүг 10 хувь болгон дахин бууруулсан. 24 сараас дээш хугацаатай тэтгэвэр барьцаалсан зээлийн хүү 18 хувь байгааг бууруулах хүсэлтийг ахмадууд байнга тавьдаг учраас ХНХЯ, арилжааны банкуудтай хамтран ажилласнаар  18 хувийн хүүтэй олгож байсан зээлийн хүүг 2019 оны аравдугаар сарын 1-нээс эхлэн 15.6 хувь болгон бууруулж, хугацааг 24 сар болгосныг салбарын сайд мэдээлж байсан. Түүнчлэн 2020 оны нэгдүгээр сараас зээлийн хүүг дахин 2.6 пунктээр бууруулж 13 хувь болгохоор арилжааны банкуудтай санал нэгдсэн.  12 сар хүртэлх хугацаатай зээлийн тухайд 10 хувийн хүүтэйгээр олгох ажлыг үргэлжлүүлнэ гэж байв. Мөн тэтгэврийн зээлийн хүүг үе шаттай бууруулснаар өнгөрсөн хугацаанд нийт 284 761 тэтгэвэр авагч 280.1 тэрбум төгрөгийн зээлийг бага хүүтэйгээр авч, 6.3 тэрбум төгрөгийн зээлийн хүүгийн дарамтаас чөлөөлөгдсөн гэсэн мэдээллийг өгч байв. Тэгвэл одоо тэтгэвэрийн зээлийг нэг удаа тэглэхтэй зэрэгцэн ахмад настай иргэдийн амьжиргааны эх үүсвэр болох  ТЭТГЭВЭР-ийг зээлийн барьцаанд тавьдаг асуудлыг эргэн харж, шийдвэрлэх, өөр бүтээгдэхүүнээр солих   арга зам эрэлхийлж байгаа гэж байна.   Статистик  дурдахад, Нийгмийн даатгалын сангаас улсын хэмжээнд 418  400 иргэн тэтгэвэр авч байна. Тэгвэл  2019 оны арваннэгдүгээр сарын байдлаар 233  034 иргэн 776 тэрбум төгрөгийн тэтгэврийн зээлийн үлдэгдэлтэй байгаа юм. Зээлийн бүтцийг харахад иргэдэд олгосон зээлийн өрийн үлдэгдэл 2019 оны аравдугаар сарын эцэст 12.2 их наяд төгрөг байсан. Тэгвэл үүний 6.5 хувь  нь  тэтгэврийн зээл байна. Нийт тэтгэврийн зээлийн 95 хувь нь Төрийн банк, Хаан банкаар олгогджээ. Эх сурвалж: zindaa.mn