Орхон аймгийн Жаргалант сумын Засаг даргын тамгын газар, Эрүүл мэндийн газар,  “Энх Эрдэнэтийн Хөгжил” ТББ хамтран “Эрүүл Жаргалантчууд” эрүүл мэндийн үзлэг зохион байгууллаа.  3 багийн 1000 гаруй иргэдэд БОЭТ, хувийн ортой эмнэлэг, үүдэн эмнэлэг, ӨЭМТ-үүдийн 40 гаруй эмч багаж,  тоног төхөөрөмжөө суурилуулан, чих хамар хоолой, мэдрэл, эмэгтэйчүүд, эрэгтэйчүүд, уламжлалт, дотор, зүрх судас, эхо оношилгоо гэх мэт нарийн мэргэжлийн үзлэг оношилгоо, эм бэлдмэлийн хямдралтай худалдааг иргэдэд ойртуулан үйлчилсэн юм. Мөн энэ үеэр “Энх Эрдэнэтийн Хөгжил” ТББ-ын тэргүүн Цогтын Бат-Энх өргөсөн тангаргынхаа төлөө, амралтын цагаараа, сайн дураар иргэдэд үйлчлэн ажиллаж байгаа эмч нарыг урамшуулан, тэдний дунд сугалаа сугалуулж, 5 эмчийг БНХАУ-ын Манжуур хотод аялах эрхийн бичгээр шагналаа. Жаргалант сумын иргэдийн тухайд Эрдэнэт хотдоо төдийгүй улсын хэмжээнд танигдсан, зэрэг цол, ур чадвар бүхий эмч нарын үзлэгийг сумаасаа авч чадсан нь  цаг хугацаа, эдийн засаг, өөрсдийн эрүүл мэнддээ оруулсан үнэтэй хөрөнгө оруулалт  гэдгийг зохион байгуулагчид онцолж байсан юм.