Р.Булгамаа: Хүүхдийнхээ тэтгэмжийг өгөхөөс бултсан аавуудыг төр албадан өгүүлнэ
Гэр бүлийн тухай хуулийн төслийн талаар хуульч Р.Булгамаатай ярилцлаа. Засгийн газраас Гэр бүлийн тухай хуулийн шинэчилсэн найруулгын төслийг боловсруулан Улсын Их Хуралд өнгөрсөн дөрөвдүгээр сард өргөн бариад байгаа билээ.
-Гэр бүлийн тухай хуульд оруулж буй гол өөрчлөлт нь юу вэ?
-Гэр бүл гэдэг бол нийгмийн хамгийн чухал институт. Энэ институт задраад байвал улс орны үндэсний аюулгүй байдал, тусгаар тогтнолд хүртэл сөргөөр нөлөөлнө. Тэгэхээр гэр бүлийг бүтэн байлгахын тулд Гэр бүлийн хуулийн зорилго агуулга чиглэгдэж байх ёстой. Сүүлийн таван жилийн байдлаар шүүхийн болон захиргааны журмаар 20 гаруй мянган гэр бүл салсан байна. Гэр бүл салалттай холбоотойгоор хүүхдийн тэтгэмжийн асуудал бий болдог. Харин манайд салсан гэр бүлийн дөнгөж 20 гаруй хувь нь л ухамсраараа хүүхдийн тэтгэмж өгдөг. Бусад нь байнга албадан төлүүлэхээр Шийдвэр гүйцэтгэлийн ажилтнуудыг араасаа гүйлгэж байдаг боловч бас учир дутагдалтай байна. Гэтэл эдгээр хүмүүст хүлээлгэх хуулийн хариуцлага бараг байхгүй байна. Өнөөдөр үйлчилж байгаа Зөрчлийн тухай хуулийн 6.20-д сар бүр төлөх ёстой хүүхдийн тэтгэмжийн мөнгийг гурван сар төлөөгүй бол 100 мянган нэгжтэй тэнцэх хэмжээтэй торгууль ногдуулна гэж заасан. Өөрөөр хэлбэл, хүүхдийнхээ тэтгэмжийг төлөхгүй байгаа аавд 100 мянган төгрөгийн торгууль ногдуулахын төлөө явна гэдэг байж боломгүй шүү дээ. Тэгэхээр гэр бүл салсантай холбоотой хамгийн их араасаа нэхэл дагал болж байдаг хүүхдийн тэтгэмжийн асуудал дээр төр анхаарлаа хандуулах ёстой гэдэг саналыг оруулж байгаа юм. Ардчилсан эмэгтэйчүүдийн холбооноос гурван сарын хугацаанд Гэр бүлийн хуультай холбоотой хамтдаа хэлэлцье аяныг зохион байгуулсан. Үүний хүрээнд ард иргэдээс ирсэн хамгийн гол санал бол хүүхдийн тэтгэмжээр эргэн төлөгдөх сан буюу төрийн сан байгуулъя гэж байгаа юм. Сар бүр тухайн хүүхдэд амьжиргааны доод төвшинтэй тэмцэх хэмжээний мөнгийг хүүхдийн данс руу шууд хийдэг байх юм.
-Тэгэхээр гэр бүл салсан тохиолдолд хүүхдийн тэтгэмжийг аав, ээж бус төр олгоно гэсэн үг үү?
-Төр зөвхөн зохицуулалт л хийх юм. Төрийн зүгээс хүүхдийнхээ мөнгийг өгдөггүй, ухамсаргүй аавуудаас авах ажлыг төр өөрөө зохицуулах ёстой. Цалингаас нь суулгаж ав. Төлөх орлогогүй гэж байгаа бол албадан ажил хийлгэ. Нийгмийн туст олон ажилд тэтгэмжээ төлөхгүй байгаа хүмүүсийг хамруулах боломжтой. Иймэрхүү зохицуулалтаар энэ асуудлыг шийдэх ёстой гэж үзэж байгаа юм. Тиймээс гэр бүлийн тухай хууль хэлэлцэж байгаа энэ үед хүүхдийн эргэн төлөгдөх тэтгэмжийн санг бий болгоё. Ингээд хүүхдэд төр тодорхой хугацаанд тэтгэмжийн мөнгийг нь өгдөг байх саналыг тавьж байгаа юм. Монгол Улсын Үндсэн хуульд эх, нялхас, хүүхэд төрийн хамгаалалтад байна. Төр хүүхдээ хайрлах ёстой. Энэ зармаар өнчин өрөөсөн өсч байгаа хүүхдүүдэд төрийн бодлого хэрэгтэй байна гэдэг саналыг тавьсан.
-Гэр бүлийн тухай хуулиар гэр бүлээс гадуурах харилцаа үүссэн тохиолдолд хуулийн хариуцлага хүлээлгэх заалт оруулсан, үүнийг хуулиар зохицуулах шаардлагатай гэдэг асуудлыг ярьдаг. Нэмэлт өөрчлөлтөд энэ талаарх өөрчлөлт оруулсан уу?
-Гэр бүлийн тухай хуулийн шинэчилсэн найруулгаар гэр бүл салж байгаа шалтгаан нөхцөлийг судалсан. Өнөөдөр үйлчилж байгаа Гэр бүлийн тухай хуулиар гэр бүлийн гишүүдийн хариуцлагын асуудал учир дутагдалтай байна. Шинэ хуульд гэр бүлийн гишүүдийнхээ өмнө хүлээх хариуцлага, хүүхдүүдийнхээ өмнө хүлээх, эцэг, эх байх хариуцлагыг нэлээд тодорхой зааж зохицуулах шаардлагатай байгаа. Иргэдээс хүсч байгаа зүйл бол гэр бүл салахад нөлөөлж байгаа хүчин зүйлүүдэд хариуцлага хүлээх асуудал их чухал гэдэг асуудлыг тавиад байгаа. Гэр бүл салахад юу нөлөөлөөд байгаа юм бэ. Бие биенээ хуурдаг, мэхэлдэг харилцаа ч гэр бүл салахад нөлөөлдөг. Энэ бүхэнд ч хуулийн хариуцлага хэрэгтэй гэдэг саналыг иргэдээс ирүүлж байгаа. Хууль санаачлагчид, УИХ-ын гишүүд энэ асуудалд хэрхэн хандахыг мэдэхгүй байна. Ер нь иргэдийн хүсэлт энэ асуудалд нэлээн чиглэгдэж байгаа гэдгийг хэлмээр байна.
0
0
0
0
0
0
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ETimes.mn хариуцлага хүлээхгүй.